Көкпекті ауданында мемлекеттік қызметшілер арасында Абай Құнанбайұлының туғанына 180 жыл толуына орай ерекше зияткерлік шара өтті, деп хабарлайды Tura18.kz.
Ұлы ойшылдың мерейтойына арналған «Сен Абайды білесің бе?» атты куиз ойыны ақын шығармашылығын қамтыды.
Сайысқа әр салада еңбек етіп жүрген мемлекеттік қызметшілерден құралған бес команда қатысты. Зияткерлік жарыстың басты мақсаты – мемлекеттік қызметшілер арасында Абай шығармашылығын кеңінен насихаттап, рухани байлықты ұлықтау.
Іс-шараны аудандық ішкі саясат бөлімінің басшысы Азат Қайратұлы ұйымдастырды. Зияткерлік кеш Алижан Артықбаев жүргізді.
Командалардың атауларына қарап-ақ Абай әлеміне қаншалықты деңгейде құрмет көрсетілгенін байқауға болады. Мәселен, «Жидебай», «Абай жастары», «Сегізаяқ», «Абай ұрпақтары», «Абай хакім, біздер әкім» деген атауларды еншілеген топтар білім сайысының көрігін қыздырды. Олар Абайдың өмір жолы, шығармалары, қара сөздері мен поэзиясын қамтыған сұрақтарға жауап беріп, өз білімдерін сынады.
Нәтижесінде бірінші орынды «Абай хакім, біздер әкім» командасы жеңіп алса, екінші орынды «Сегізаяқ», үшінші орынды «Абай ұрпақтары» иеленді.
Жеңімпаздар мен жүлдегерлер алғыс хатпен, ақшалай сыйлықтармен марапатталды.
Абайды танып-білу – тек мәдени мұрамызға құрмет емес, сонымен қатар әрбір мемлекеттік қызметшінің ой өрісін кеңейтетін рухани тәрбие. Мұндай игі бастамалар алдағы уақытта да жалғасын табады деген сенім бар.
