Астананың іргесіндегі Қосшы қаласында өткен республикалық «Туған күніңмен, Қосшы!» атты жайдарман фестивалінде «Көкпекті» командасы жүлдегер атанды, деп хабарлайды Tura18.kz.
Бұған дейін «Шұғылбай құрамасы» атауымен облыс және республика деңгейінде ауыз толтырып айтарлықтай ойын өрнегін көрсетіп жүрген жайдарманшыларымыз биыл команда атын «Көкпекті» деп өзгертті. Есен Елеукен жүргізген бұл жайдарман ойынына республиканың түкпір-түкпірінен сайдың тасындай іріктелген 10 команда катысты. Кіл мықтылар арасындағы бәсеке аса тартысты өтті. Фестивальдің жалпы жүлде қоры 1 миллион теңге көлемінде болды. Атап айтқанда, бірінші орынға 500 мың теңге, екіншіге 250 мың теңге, үшінші орынға 150 мың теңге ақшалай сыйлық берілді. Сонымен қатар «Үздік ойыншы» аталымын иеленген ойыншы 50 мың теңге ақшалай сыйлыққа ие болды.
Өнерпаздар додасында Абай облысының атынан қатысқан «Көкпекті» жайдарман командасының мүшесі Қуаныш Төлегенов «Үздік ойыншы» аталымын жеңіп алды. «Көкпекті» құрамында жиыны төрт адам ойнайды. Олар: Қуаныш Төлегенов, Қуаныш Қабаев, Бақдаулет Муратов және Данара Жумашова.
Есен Елеукеннің лигасында сәтті ойын көрсетіп жүрген әзілкештеріміздің талабы зор. Жайдарманшыларға сәттілік және чемпиондық жеңіс тілейміз!
Фархат Маратұлы
