Семей қаласының полиция бөлімінің алдында үш жігіт бір ер адамды жабылып сабап кетті. Іле-шала екі күдікті ұсталып, уақытша ұстау изоляторына қамалды. Үшінші адамды полиция іздестіріп жатыр, деп хабарлайды Tura18.kz.
Оқиға тапа-тал түсте, Дулатов көшесінің бойында, орталық полиция бөлімінен қарға адым жерде болған. Үш ер адам бір жігітті жерге жатқызып алып аяусыз тепкілеп, артынан біреуі пышаққа ұқсас затпен ұрған. Бұл жәйт куәгерлер түсірген бейнежазбадан анық көрінеді. Бейнежазба әлеуметтік желілерде жарияланды.
Полицияның хабарлауынша, күдіктілердің екеуі ұсталып, қамауға алынған.
Аталған оқиға бойынша қылмыстық іс қозғалды. Жүргізілген жедел іс-шаралардың нәтижесінде екі күдікті ұсталып, уақытша ұстау изоляторына қамалды. Тағы бір адамның қайда екені анықталып жатыр. Алдын ала мәліметтер бойынша, төбелес жеке бас араздықтан туындаған. Қылмыстық-процестік кодекстің 201-бабына сәйкес, сотқа дейінгі тергеп-тексеруге қатысты басқа ақпарат жария етуге жатпайды, — деп хабарлады Абай облысының полиция департаменті.
