Абай Құнанбайұлының мерейтойы аясында ұйымдастырылған 180 шақырымдық ультрамарафонда Орал қаласынан келген желаяқ топ жарды, деп хабарлайды Tura18.kz.
Төзімділік пен ерік-жігерді сынайтын жарыстың бірі — ультрамарафон. Осындай ерекше додада Орал қаласының өкілі Баубек Ильясов топ жарып, ел назарына ілікті. Ол Семей қаласынан Қарауылтөбеге дейінгі 180 шақырымдық қашықтықты 19 сағат, 9 минут, 45 секундта бағындырып, өзгелерден оқ бойы озып шықты.
Баубек Ильясов — Батыс Қазақстан облысы, Қазталов ауданынан шыққан, қарапайым ауыл тумасы. Қазір ұстаздық қызмет атқарып, жас ұрпаққа білім мен тәрбие беріп жүр. Күнделікті кәсіби міндетінен бөлек ол спортты өмірінің ажырамас бөлігіне айналдырған.
Айта кетейік, ұлы марафон Семей қаласының Абай атындағы халықаралық әуежайынан басталып, Қарауылтөбеде, Абай мұрасымен ұштасқан қасиетті мекенде мәресіне жетті.
