Қ.Алтынбаев атындағы Көкпекті аудандық мәдениет үйінде Мемлекеттік қызметшілер күні мерекесіне арналған салтанатты іс-шара өтті, деп хабарлайды Tura18.kz.
Өркениеттің өріне қадам бастаған әрбір мемлекеттің ең басты тірегі, оның идеясы мен саясатын ілгерілетуші – мемлекеттік қызметшілер. Ұлт мәртебесін көтеріп, ел абыройын асқақтататын мемлекеттік қызметші болу – қастерлі міндет. Баршаңызға аудан тұрғындарының тұрмыс-тіршілігін жақсартуға, еліміздің дамуына қосып жатқан үлестеріңіз үшін алғыс білдіремін, – деп құттықтау сөз сөйлеген аудан әкімі Әділет Қожанбаев ауданның дамуына зор үлес қосқан мемлекеттік қызметшілерді марапаттады.
Бұдан кейін Қ.Алтынбаев атындағы мәдениет үйінің өнерпаздары әуелете ән шырқап, күмбірлетіп күй төкті. Жиылған көпшілікке көтеріңкі көңіл-күй сыйлады.
Концерттің шымылдығы туған жерге деген сағынышты сездірген «Көкпектім менің» әнімен ашылды. Сөзін Шөмішбай Сариев, әнін Марс Сүлеев жазған туындыны Нұрлан Қайратұлы мен Айдана Есполова орындап, көрерменнің жүрегінен орын алды.
Кеш барысында «Ауылым» әнін Хасенов Жанабай орындап, туған жердің қадірін әуезді үнмен жеткізді. Ал Алматыда білім алып жатқан, Құрманғазы атындағы Қазақ ұлттық консерваториясының студенті, жерлесіміз Дулат Манарбеков әлемге әйгілі «O sole mio» әнін шырқап, ерекше қошеметке ие болды. Сондай-ақ Айнұр Жүнісова «Гүлдер», Зейнолла Кеней «Қазақ елі» әндерін орындап, мемлекеттік қызметшілерге деген алғыс пен құрметтің көркем көрінісін көрсетті. Мерекелік концерт «Атамекен» әнімен қорытындыланып, еліміздің бейремси әнұранына айналған туындыны залдағылар орындарынан тік тұрып, қосыла шырқады.
Айта кетейік, бүгінгі күні Көкпекті ауданында 140-тан аса мемлекеттік қызметші бар. Оның ішінде 100 қызметші жергілікті атқарушы органда, қалғандары орталық және аумақтық мекемелерде қызмет етеді. Еліміздегі өркениет пен мәдениеттің даму көшіне ілесу үшін бар күшін салып, жүйелі түрде әрі талапқа сай еңбек етіп келе жатқан барлық мемлекеттік қызметшілерге жетістік пен табыс тілейміз.
Фархат Маратұлы
