Былтыр мамыр айында Үкімет жаңа цифрлық Алатау қаласының бас жоспарын бекіткен болатын. Сол сәттен бастап даму бағыты айқындалды: төрт тақырыптық аудан қарастырылған – Gate City (іскерлік және қаржы орталығы), Golden District (білім беру мен медицина), Growing District (инновациялар, индустрия және логистика), Green District (туризм). Әр ауданға нақты функциялар жүктелгендіктен, қаланың құрылымы да жүйелі әрі ойластырылған болуға тиіс, деп хабарлайды Tura18.kz.
Шамамен 30 жылдан кейін Алатау толыққанды мегаполиске айналуы жоспарланып отыр. Онда 2,04 млн адам тұрады, 1 млн-нан астам жұмыс орны ашылады, ондаған мың студент оқиды және жыл сайын миллиондаған турист қабылданады. Қаланың жаһандық маңызы бар. Бұл – ауқымды капиталды, ғылымды, технологияны және мәдени өмірді өзіне тартатын жаңа орталық, өңірдегі ірі урбанистік кластерлерге бәсекелес бола алатын мекен.
Ал Абай облысында ерекше назар аударатын жоба – Семей маңында дамып жатқан Smart City Semey. Әрине, оның ауқымы Алатаудан шағындау: аумағы шамамен 1000 гектар, халқы – 75 мың адам. Бірақ мұнда әңгіме басқа – қалалық ортаны сапалы өзгерту, Семейге жаңа серпін беру, оны заманауи жайлылық стандарттарына жақындату.
Жоба аясында бәрі ескерілген: кең көшелер мен екі үлкен саябақтан бастап, әртүрлі қабатты тұрғын үйлерге дейін – жайлы коттедждерден 40 қабатты зәулім үйлерге дейін. Алайда басты назар әлеуметтік және мәдени инфрақұрылымға аударылған. Аксайда балабақшалар, мектептер, мешіт, этнопарк, көрме және ойын-сауық кешендері, филармония, Достық үйі, 25 мың орындық стадион, қонақүйлер, медиаорталық салу жоспарланған. Яғни, қалаға бүгінгі күні жетіспей тұрған нысандарды толықтыру көзделген.
Егер Алатауда басты бейне – болашақтың цифрлық мегаполисі болса, Семейде «Smart City» тұжырымдамасын енгізуде адамдарға арналған толыққанды қалалық экожүйе құруға басымдық берілмек. Мұндағы мақсат жаһандық орталық қалыптастыру емес, қаланы XXI ғасырдың талаптарына сай деңгейге жеткізу болып отыр.
Әмір Бек
