Президент Қасым-Жомарт Тоқаев елімізде бір палаталы Парламент құру бастамасын көтерді. Бұл туралы ол бүгінгі халыққа Жолдауында айтты, деп хабарлайды Tura18.kz.
Мен Сенатқа он жыл басшылық еттім. Бұл жұмысты қашанда зор мәртебе әрі үлкен жауапкершілік деп санадым. Сондықтан маған осы мінберден парламенттік реформа туралы айту оңай емес. Соған қарамастан мен дәл бүгін елімізде көп ұзамай бір палаталы Парламент құру туралы бастама көтергім келеді, – деді Қасым-Жомарт Тоқаев.
Оның айтуынша, бұл реформа азаматтық секторда, сарапшылар ортасында, қазіргі Парламентте жан-жақты талқылануға тиіс және оған бір жыл уақыт керек. Нәтижесінде 2027 жылы жалпыұлттық референдум өткізіледі.
Содан кейін ғана Конституцияға тиісті өзгеріс енгізе аламыз. Мен мемлекеттің тағдырын айқындайтын барлық мәселе халықтың келісімімен ғана шешіледі деп бұған дейін бірнеше рет айттым. Егер бір палаталы Парламент құру қажет деген ортақ шешімге келсек, ондай Парламентті тек партиялық тізім бойынша сайлаған жөн деп санаймын, – деді Мемлекет басшысы.
