«Жалған нөмір» жедел-профилактикалық шарасы аясында Абай облысында 240-қа жуық құқық бұзушылықтың жолы кесілді, деп хабарлайды Tura18.kz порталы Polisia.kz-ке сілтеме жасап.
Оның ішінде мемлекеттік нөмірі оқылмайтын, ұлттық стандарт талаптарына сәйкес келмейтін немесе белгіленген орындардан тыс орнатылған көлік құралын басқарған 53 жүргізуші анықталды.
Сонымен қатар 17 дерек бойынша көлік құралын мемлекеттік тіркеу нөмірлік белгісінсіз, пайдалануға тыйым салынғаннан кейін немесе белгіленген тәртіппен тіркелмеген күйде басқару фактілері тіркелді. Үш жүргізуші көрінеу жалған немесе қолдан жасалған мемлекеттік тіркеу нөмірлік белгілерімен, сондай-ақ нөмірді тануға кедергі келтіретін құрылғылар мен материалдар қолданылған көлік құралын басқарғаны үшін ұсталды.
Бұдан бөлек бір дерек бойынша көлік құралына көрінеу жалған немесе қолдан жасалған мемлекеттік тіркеу нөмірлік белгісін орнату фактісі анықталды. Іс-шара барысында тоғыз жүргізушінің көлік құралын мас күйінде басқарғаны белгілі болып, оларға заңнамаға сәйкес тиісті шаралар қабылданды.
Жедел-алдын алу шарасы аясында 18 көлік құралы айып тұрағына қойылды, оның ішінде бір шетелдік есепте тұрған көлік құралы бар.
