Абай облысының әкімі Берік Уәли Бородулиха ауданына жұмыс сапары барысында тұрғындарды жеке мәселелері бойынша қабылдады. Қабылдауға келген азаматтар жол жөндеу, көшелерді жарықтандыру, мәдениет және спорт нысандарын салу, абаттандыру мәселелерін көтерді, деп хабарлайды Tura18.kz.
Атап айтқанда, тұрғындар Бақы ауылдық округіндегі Ауыл–Коростели, Новопокровка–Белағаш бағытындағы жолдарды жөндеу, Ауыл станциясындағы көшелерді жарықтандыру, Бородулиха ауылындағы бірқатар көшеге асфальт төсеу жөнінде ұсыныстарын айтты.
Мәдениет үйі мен хоккей алаңы қажет
Жерновка ауылында мәдениет үйі мен Жаңа Шүлбі ауылында жетім балаларға арналған интернат аумағында жабық хоккей алаңын салу, Петропавловка ауылының ішіндегі көше жолдарын жөндеу секілді ұсыныстар да назардан тыс қалмады. Аймақ басшысы тиісті басқармаларға нақты тапсырмалар берді.
Азаматтарды қабылдау барысында облыс әкімі тұрғындар көтерген өзекті мәселелерді кезең-кезеңімен шешуді жауапты сала басшыларына жүктеді.
Қабылдауда Бородулиха ауданының тұрғындары тарапынан көтерілген мәселелердің барлығымен жақсы таныспын. Биыл 20 шақырым болатын Новопокровка-Белағаш жолының 10 шақырымына орташа жөндеу жүргіземіз. Қалған бөлігін келер жылы жөндеу жоспарда бар. Сондай-ақ биыл аудан орталығындағы үш көшеге асфальт төселеді. Қалған көшелерді келер жылдың жоспарына енгіземіз. Осылайша аудандағы мәселелерді кезең-кезеңімен шешеміз. Менің жеке бақылауымда болады, – деді аймақ басшысы.
Облыс әкімінің азаматтарды жеке мәселелері бойынша қабылдауының алдында басқарма басшылары аудан тұрғындарын қабылдап, сауалдарына жауап берді.
Абай облысы әкімінің баспасөз қызметі
