Абай Құнанбайұлының 180 жылдық мерейтойына белсене атсалысқан бірқатар көкпектілік облыстық және аудандық деңгейдегі марапаттарға ие болды, деп хабарлайды Tura18.kz.
Дүбірлі той қарсаңында Көкпектіден Қарауылға (Абай ауданының орталығы) дейінгі 350 шақырым қашықтықты атпен жүріп өткен Ерлан Әзімбайға аймақ басшысы Берік Уәлидің атынан ат мінгізілді. Тұлпарды Көкпекті ауданының әкімі Әділет Қожанбаев табыс етті.
Абай атамыз сияқты ұлы тұлғалар санаулы. Қазақ десе Абай, Абай десе қазақ деп түсінетін халықпыз. Сондықтан атамыздың мерейтойында шетте қалмай Көкпекті жұрты бір кісідей қатысты. Болашақта да осындай үлкен іс-шараларда елдің ауызбіршілігін, ынтамағын көрсетіп, «бір жағадан бас, бір жеңнен қол шығарып» әрекет етеміз деп сенемін. Тойға атсалысқан баршасына алғыс айтамын, – деді аудан әкімі.
Хәкім тойында ерекше көзге түскен Айгерім Ахан, Аягөз Мұқиятқызы және Елдос Төкенов қатарлы өнерпаздарға аудан әкімінің алғыс хаттары табысталды. Бұл олардың «Жеті қазына» фестивалі мен «Сұлу әйел» байқауындағы жетістіктерінің, спорт пен білімдегі табыстарының, еріктілер қозғалысына атсалысқан белсенділіктерінің жемісі.
Өткенде Абай атамыздың тойына Көкпекті ауданынан атпен барған едім. Бүгін міне сол жүріп өткен жолымды, еңбегімді және аттың терін елеп-ескеріп облыс әкімі Берік Уәлиұлы астыма тұлпар мінгізді, көп рақмет. Еліміз аман, жұртымыз тыныш болсын. Баршаңызға жақсылық тілеймін, – деді Ерлан Әзімбай.
Ата кетейік, көкпектіліктер ұлы ақынның мерейтойына ауыз толтырып айтарлықтай зор үлес қосты.
