Қазақстандық AGRON стартабы ауыл шаруашылығы мен арнайы техника нарығына жаңа тәсіл ұсынды. Жоба дәстүрлі маркетплейс немесе техника сататын интернет-дүкен форматынан өзгеше: пайдаланушы қажетті техниканы дайын күйінде таңдап қана қоймай, оның негізгі параметрлерін өз талабына сай конфигурациялап, тапсырысты тікелей өндіруші зауытқа жолдай алады.
Компания бұл модельді «виртуалды зауыт» деп атайды. Яғни техника алдымен цифрлық ортада клиенттің нақты қажеттілігіне қарай «құрастырылады», содан кейін ғана сол конфигурация бойынша өндірісте жасалады.
Дайын техниканы емес, өзіне қажетті нұсқаны таңдайды
Дәстүрлі сауда жүйесінде сатып алушы көбіне дилер немесе дистрибьютор қоймасындағы дайын техника арасынан таңдау жасауға мәжбүр. Мұндай жағдайда машинаның кейбір сипаттамалары клиентке қажет болмауы немесе, керісінше, қажетті параметрлер жетіспеуі мүмкін.
AGRON осы мәселені тапсырыс бойынша конфигурациялау жүйесі арқылы шешуді көздейді.
Мысалы, бір шаруашылыққа салмағы бес тоннадан аспайтын техника қажет болуы мүмкін. Екінші кәсіпкердің қоймасы немесе қорасының биіктігі үш метр болғандықтан, техниканың жалпы биіктігі 2,7 метрден аспауы керек. Ал күріш шаруашылығымен айналысатын кәсіпкерге көлемі 1,5 текше метр болатын арнайы шөміш қажет болуы ықтимал.
Платформада осындай талаптар жеке көрсетіліп, техника клиенттің жұмыс жағдайына қарай бейімделеді.
Осылайша пайдаланушы өндіруші немесе дилер алдын ала белгілеп қойған дайын комплектацияны сатып алмай, өз жұмысына қажетті техниканың параметрлерін өзі қалыптастырады.
Тапсырыс тікелей зауытқа түседі
AGRON-ның негізгі қағидаларының бірі — Direct-to-Factory, яғни тапсырысты тікелей өндірушіге жеткізу.
Компанияның түсіндіруінше, мұндай жүйе бірнеше аралық буынды қысқартып, дилерлер мен дистрибьюторлардың үстеме бағасына тәуелділікті азайтуға мүмкіндік береді. Сонымен қатар тапсырыс берушіге техниканың сипаттамасын өндіріс басталғанға дейін нақтылауға жағдай жасалады.
Платформа арқылы клиент қажетті техниканы таңдап, оның техникалық параметрлерін конфигурациялап, әртүрлі нұсқаларды салыстырып, тапсырыс бере алады.
AGRON стартабының авторы Ғалымжан Мақбозұлы жобаның басты ерекшелігі дайын техниканы сатуда емес, әр клиентке қажетті техниканы жеке конфигурациялауға мүмкіндік беруде екенін айтады.
AGRON — шаруаларға жаңа серпін беретін платформа. Біздің басты артықшылығымыз — қарапайым техника сататын сайт немесе маркетплейс еместігімізде. Клиент өзіне қажетті техниканың параметрлерін өзі таңдап, конфигурациясын қалыптастырады да, сол нұсқа бойынша тапсырыс тікелей зауытқа беріледі. Сондықтан біз бұл жүйені “виртуалды зауыт” деп атаймыз. Яғни техника алдымен біздің цифрлық ортада құрастырылады, содан кейін ғана нақты зауытта өндіріледі. Бір клиентке салмағы бес тоннадан аспайтын техника керек болуы мүмкін, енді біріне қорасының биіктігіне байланысты 2,7 метрден биік емес модель қажет. Ал күріш шаруашылығымен айналысатын кәсіпкерге 1,5 текше метрлік шөміш керек болуы ықтимал. Дәстүрлі саудада адам көбіне дилердің немесе дистрибьютордың қоймасындағы дайын техниканың арасынан таңдауға мәжбүр. Ал біздің модельде техниканың әрбір маңызды параметрін нақты қажеттілікке сай бейімдеуге болады, – деді Ғалымжан Мақбозұлы.
Қытайдың ірі өндірушісімен жұмыс басталған
AGRON қазіргі уақытта арнайы техника шығаратын қытайлық Shandong Mingyu Heavy Industry Machinery компаниясымен, яғни MYZG брендімен ынтымақтастықты бастағанын мәлімдеді.
Стартап өкілдерінің айтуынша, қытайлық өндіруші AGRON ұсынған модельді қолдап, платформа арқылы жасалған жеке конфигурациядағы тапсырыстарды қабылдай бастаған.
Бұл серіктестік AGRON-ның виртуалды конфигурациядан нақты өндіріске дейінгі тізбекті іс жүзінде жүзеге асыруына мүмкіндік бермек.
Alibaba мен Made-in-China-дан айырмашылығы қандай?
Alibaba немесе Made-in-China секілді ірі B2B платформаларда сатып алушы түрлі өндірушілер мен сатушылардың ұсыныстарын салыстырып, дайын өнімді немесе белгілі бір модельді таңдай алады.
AGRON өз моделін бұдан өзгеше бағытта дамытуды көздейді. Платформаның басты мақсаты — клиентті жай ғана сатушымен байланыстыру емес, оның жеке талабын өндірістік тапсырмаға айналдырып, сол сипаттамалар бойынша техниканы тікелей зауытта жасату.
Яғни AGRON-да басты өнім — тек техниканың өзі емес, оны клиенттің қажеттілігіне қарай конфигурациялау мүмкіндігі.
«Виртуалды зауыттың» географиясы шектелмейді
Жобаның тағы бір ерекшелігі — оның белгілі бір өндіріс алаңына тәуелді болмауы.
Дәстүрлі зауыт салу үшін ірі инвестиция, инфрақұрылым және бірнеше жыл қажет. Ал AGRON технологиялық платформаны Қазақстанда дамытып, өндірістік тапсырыстарды әртүрлі елдердегі зауыттар арқылы орындауды жоспарлап отыр.
Компанияның көзқарасы бойынша, болашақта бір цифрлық жүйеге бірнеше өндірушіні біріктіріп, тапсырыстарды әр елден қабылдауға болады.
Қазір біз арнайы техника шығаратын Қытайдағы ірі компаниялардың бірі — MYZG брендімен, яғни Shandong Mingyu Heavy Industry Machinery кәсіпорнымен жұмысымызды бастадық. Олар біздің шешімді бірден қолдап, тікелей тапсырыстарымызды қабылдай бастады. Технология мекенжаймен де, шаршы метрмен де өлшенбейді. Біздің виртуалды зауыт Қазақстанда құрылады, ал оның пайдаланушылары әлемнің әр түкпірінен болуы мүмкін, – деді стартап авторы Ғалымжан Мақбозұлы.
Ауыл шаруашылығы үшін жаңа мүмкіндік
Арнайы және ауыл шаруашылығы техникасын таңдауда оның бағасынан бөлек, нақты жұмыс жағдайына сәйкестігі де маңызды. Сондықтан AGRON стандартты модельдерді сатудан гөрі техниканы нақты шаруашылықтың талабына қарай бейімдеуге басымдық беріп отыр.
Жоба сәтті дамыған жағдайда қазақстандық фермерлер мен кәсіпкерлерге тек дайын техниканы сатып алушы емес, оның конфигурациясын тікелей анықтайтын тапсырыс беруші болуға мүмкіндік береді.
Осы тұрғыдан AGRON-ды қарапайым маркетплейс емес, өндіруші мен соңғы клиент арасындағы байланысты цифрлық форматта қайта құруға бағытталған технологиялық платформа деуге болады.
