Халықтың денсаулығын сақтау, жұқпалы аурулардың алдын алу және санитариялық қауіпсіздікті қамтамасыз ету – көзге көріне бермейтін, бірақ қоғам үшін аса маңызды міндет. Бұл бағыттағы жауапты жұмысты күн сайын атқарып жүрген санитариялық-эпидемиологиялық қызмет мамандарының еңбегі ерекше құрметке лайық.
15 қыркүйек – санитариялық-эпидемиологиялық қызмет саласында еңбек ететін мамандардың кәсіби мерекесі. Бұл күн халықтың санитариялық-эпидемиологиялық салауаттылығын қамтамасыз ету жолында қызмет етіп жүрген мамандардың еңбегін бағалап, олардың кәсіби жауапкершілігі мен қоғам үшін атқарып отырған маңызды қызметіне назар аударуға мүмкіндік береді.
Санитариялық-эпидемиологиялық қызметтің негізгі бағыттарының бірі – халық арасында жұқпалы және паразиттік аурулардың таралуының алдын алу. Бұл үшін мамандар санитариялық жағдайды бақылап, профилактикалық іс-шараларды ұйымдастырады, аурулардың таралу қаупін зерттейді және санитариялық талаптардың сақталуына мониторинг жүргізеді.
МАМАН ЕҢБЕГІ — ХАЛЫҚ ДЕНСАУЛЫҒЫНЫҢ КЕПІЛІ
Мамандар тек жұқпалы ауруларды назарда ұстамайды. Ауызсудың, азық-түліктің және қоршаған ортаның қауіпсіздігі де санитариялық-эпидемиологиялық қауіпсіздіктің маңызды бөлігі. Мектеп, балабақша, медициналық ұйымдар, қоғамдық тамақтану орындарында және басқа да нысандарда санитариялық талаптардың сақталуы адам денсаулығын қорғауда маңызды рөл атқарады. Бұл қызметтің басты ерекшелігі – ауру пайда болғаннан кейін әрекет етумен шектелмей, оның алдын алуға басымдық беруінде.
Жұқпалы аурулардың таралуына жол бермеу үшін халық арасында түсіндіру жұмыстары жүргізіледі. Жеке бас гигиенасын сақтау, қауіпсіз тамақтану, таза ауызсу пайдалану және қоршаған ортаның тазалығын сақтау жөнінде ақпарат беріледі. Әсіресе, маусымдық кезеңдерде жұқпалы аурулардың алдын алу шараларының маңызы арта түседі. Қарапайым санитариялық-гигиеналық талаптарды сақтау арқылы әр азамат өз денсаулығын қорғап қана қоймай, айналасындағы адамдардың да қауіпсіздігіне үлес қоса алады.
Санитариялық-эпидемиологиялық сала мамандарының жұмысы зертханалық зерттеулер мен бақылау жұмыстарымен ғана шектелмейді. Қажет болған жағдайда мамандар ауру ошақтарындағы эпидемиологиялық жағдайды бағалап, инфекцияның таралуына жол бермеу бойынша тиісті шараларды ұйымдастыруға атсалысады. Сондықтан бұл салада кәсіби білім мен тәжірибемен қатар ұқыптылық, жедел шешім қабылдау, жауапкершілік және халықпен дұрыс қарым-қатынас орната білу де маңызды.
Халықтың санитариялық-эпидемиологиялық қауіпсіздігі – мемлекеттің маңызды міндеттерінің бірі. Ал осы бағыттағы жұмыстардың нәтижелі жүзеге асуы білікті мамандардың күнделікті еңбегіне тікелей байланысты. 15 қыркүйек – осы салада қызмет етіп жүрген барша мамандарға құрмет білдіретін ерекше күн. Бұл – олардың кәсіби еңбегін бағалап, халық денсаулығын қорғау жолындағы жауапты қызметіне алғыс айтуға жақсы мүмкіндік.
Айғаным Қуанышқызы
