Белгілі ғалым, медицина ғылымдарының кандидаты, профессор, микробиолог Марат Уразалин ұзаққа созылған сырқаттан кейін 82 жасында өмірден өтті.
Марат Мауытқанұлы 1942 жылы 15 қазанда Көкпекті ауылында дүниеге келген. 1959 жылы Семей медициналық институтына оқуға түсіп, оны тәмамдаған соң микробиология кафедрасында еңбек жолын бастаған. Харьков медицина институтының аспирантурасын бітіріп, иммунология бойынша диссертация қорғаған. Оқу орнына қайта оралған ол микробиология кафедрасының доценті болды.
Ғылыми қызметімен қатар қоғамдық істерге де белсене атсалысты. 90-жылдары оқу ісі жөніндегі проректор қызметін атқарып, білім беру мен денсаулық сақтау жүйесіне жаңа өзгерістер енгізуге үлкен үлес қосты.
2002 жылы микробиология кафедрасының профессоры атағын алды.
Марат Мауытқанұлы «Невада-Семей» қозғалысының алғашқы белсенділерінің бірі болды. 1989–2000 жылдары осы қозғалыстың төрағасы қызметін атқарды. Әр жылдары ядролық қару мәселесіне, жастар тәрбиесі мен нашақорлық проблемаларына арналған халықаралық конференцияларға қатысты. Университет тарихындағы ең үздік идеяның авторы болды, шетелдік студенттерге арналған факультет ашып, оларды ағылшын тілінде оқыту бастамасын ұсынды. Оның бастамаларының арқасында университет көптеген шетелдік жоғары оқу орнымен және ұйымдармен серіктестік орнатып, халықаралық байланыстарды дамытты. Бұл әріптестік бүгінгі күнге дейін жалғасып келеді.
Марат Мауытқанұлы жоғары кәсіби біліктілігі, еңбексүйгіштігі, ісіне адалдығы, адамгершілігі, қайырымдылығы және жүрегінің кеңдігімен ерекшеленді. Осы қасиеттерінің арқасында әріптестерінің де, шәкірттерінің де құрметі мен ыстық ықыласына бөленді.
«Талантты ғалым, ұлағатты ұстаз болған Марат Мауытқанұлының жарқын бейнесі жүрегімізде мәңгі сақталады», дейді әріптестері.
