Абай облысында көлік жолдары мен жылыту бекеттерін алдағы қысқа дайындау жұмысы пысықталды. Бұл мәселе облыс әкімі Берік Уәлидің төрағалығымен өткен кеңейтілген аппараттық кеңесте қаралды, деп хабарлайды Tura18.kz.
Облыстағы автомобиль жолдары мен елді мекен көшелерінің жалпы ұзындығы – 10 228 шақырым. Биыл оның 408 шақырымы жөнделеді. Қазіргі уақытта облыстық маңызы бар үш нысанда жөндеу аяқталған, тағы төртеуінде жұмыс жалғасып жатыр.
Қысқы кезеңде жолдарды күтіп ұстау үшін 100-ге жуық арнайы техника жұмылдырылмақ. Қажет болған жағдайда жеке кәсіпкерлердің ресурстары тартылуы мүмкін.
Республикалық маңызы бар 2 176 шақырым жолға «Қазавтожол» АҚ Абай облыстық филиалы жауапты. Бұл жұмыстарға 308 қызметкер, 107 техника, сондай-ақ 22 өндірістік база мен 7 жол пайдалану учаскесі тартылған.
Қолайсыз ауа райы жағдайында жолаушыларды уақытша орналастыру үшін облыс аумағында 121 жылыту бекеті дайын. Олардың жалпы сыйымдылығы — 1120 адам.
Жиын барысында облыс әкімі аудан және қала басшыларына жол жөндеу жұмыстарын сапалы аяқтауды, республикалық жолдардың қысқы дайындығын қамтамасыз етуді және жылыту бекеттерінің жұмысын қатаң бақылауда ұстауды тапсырды.
