Көкпекті аудандық мәдениет үйінде көпбалалы ана, тігінші, қолөнер шебері әрі талантты дизайнер Айгерім Қилыбаева дайындаған «Фреш мода» сәндік коллекциясының көрсетілімі ұйымдастырылды, деп хабарлайды Tura18.kz.
Ауданда мұндай форматтағы кеш алғаш рет өткізіліп отыр. Көрермендер мен ұйымдастырушылардың жүрегін тебіренткен әсерді сөзбен жеткізу қиын, онда табиғаттың барлық бояулары бір арнаға тоғысқандай болды.
Кеш бастамашысы — «Асыл ана» аналар қоғамдық бірлестігінің төрайымы, аудандық мәслихат депутаты, көпбалалы ана Асыл Төлешова. Ол екі жыл бойы осы ойды жүзеге асыруға талпынып, аудан халқына сұлулық пен шабыт сыйлауды, талантты шеберді қолдауды мақсат етті. Игілікті бастама аудан әкімінің орынбасары Аслан Таныспаевтың қолдауының арқасында жүзеге асты.
Бұл сән кеші ауданымыздың жаңа мәдени брендіне айналды деуге толық негіз бар. Көрсетілімде Айгерім Ғалымжанқызының қолынан шыққан бірегей туындылар көрермен назарына ұсынылды. Көрсетілімде көрермен назарына ұсынылған туындылардың қатарында:
Халықаралық байқауларда бірнеше мәрте жүлдегер атанған «Балауса» би ұжымының сахналық костюмдері;
Республикалық байқаулардың жеңімпазы «Кәусәр» жетігеншілер ансамблі мен «Асыл ана» аналар ансамблінің киімдері;
Қазақтың, орыстың, үнді мен ұйғырдың ұлттық киім үлгілері;
«Не малявка», «Candy Man», «Барби», «Теңізші» билеріне арналған жарқын костюмдер;
Тана мырзаның зайыбының тарихи бейнесін және мергендердің образын көрсететін киімдер;
«Ана мен қыз» жұптық образдары;
Күнделікті көйлектер, кешкі сәнді көйлектер мен қатаң классикалық костюмдер бар.
Әрбір костюм Айгерімнің өз қолымен, махаббатпен және төзіммен тігілгендігі көрермендерді ерекше таңғалдырды.
Бұл кештің сәнін ашқан жандардың бірі — дизайнер-безендіруші Әсем Танысбаева. Оның нәзік талғамы мен үйлесімге деген сезімталдығының арқасында зал ерекше әсемдікке бөленіп, мерекелік рухқа толы болды.
Ал мәдениет үйінің хореографы, көрсетілім жетекшісі Нарқыз Оспанова дефиле көрсетілімінің сәтті өтуіне зор үлес қосты. Оның кәсібилігі мен шығармашылық көзқарасы нәтижесінде әуесқой модельдер үлкен сахнаның кәсіби сәнгерлеріндей сенімділікпен және әсемдікпен шықты.
Подиумға шыққан әуесқой модельдер Нарқыз Оспанованың жетекшілігімен өнер көрсетті.
Кеш соңында аудан әкімінің орынбасары Аслан Танысбаев құттықтау сөз сөйлеп, дизайнерді аудан басшылығының атынан алғыс хатпен марапаттады. Бұл кеш – Көкпекті жерінде нағыз өнер мен еңбектің, арман мен шабыттың тоғысқанын көрсетті.
Айта кетейік, көкпектілік шебер Айгерім Қилыбаева алдағы уақытта өз ательесін ашуға, жаңа жұмыс орындарын құруға ниет етіп отыр.
