Моңғолияның Баян-Өлгей аймағында дәстүрлі Дүниежүзілік «Бүркітшілер тойы» аясында ІІІ Азия чемпионаты өтті. Осы дүбірлі бәсекеде Қазақстан ұлттық құрамасы сапында ел намысын қорғаған абайлық құсбегі Тәттімбет Кәпұлы жүлделі орынды иеленді, деп хабарлайды Tura18.kz.
Отыз жылдан астам уақыттан бері тойланып келе жатқан халықаралық дода бұл күнде Моңғолияның мәдени брендіне айналған. Осынау дүбірлі тойға жыл сайын әлемнің түкпір-түкпірінен мыңдаған турист пен бүркітші жиылады. Биылғы чемпионатқа әр елден 60-тан астам құсбегі қатысып, қолға шақыру, шырға тарту сайыстары бойынша сынға түсті. Қазақ құсбегілерін бұл жарысқа мемлекеттік жаттықтырушылар Арманбек пен Базарбек Күнтуған бастап барды.
Қазақстан ұлттық құрамасы сапында ел намысын қорғаған Абай облысының бүркітшісі Тәттімбет Кәпұлы «Қарагер» атты қыран құсымен жүлделі үшінші орынды, ал атыраулық құсбегі Арман Қошқаров «Аңырақай» атты бүркітімен екінші орынды иеленіп, ел абыройын асқақтатты.
Айта кетейік, дәл осындай бүркішілер бәсекесі алдағы 9-11 қазан күндері Шығыс Қазақстан облысының Бозанбай ауылында өтеді. Бүгінде Абай облысының құсбегілері көрші өңірде байрағы желбірейтін көшпенділер тойына әзірленіп жатыр.
