Абай облысында биыл егіс алқабы 782,1 мың гектарға жетіп, былтырғымен салыстырғанда 22 мың гектарға артты. Бұл туралы өңір басшысы Берік Уәлидің төрағалығымен өткен кеңейтілген аппараттық кеңесте мәлім болды, деп хабарлайды Tura18.kz.
Облыстық ауыл шаруашылығы басқармасының басшысы Ертай Қуанбаевтың мәліметінше, өңірде майлы дақылдар 339,4 мың гектарға, дәнді дақылдар 296,5 мың гектарға егілген. Мемлекет басшысының тапсырмасына сәйкес бидай алқабы 11,9 мың гектарға азайып, майлы дақылдар көлемі 42,5 мың гектарға ұлғайды.
Техникалар жаңартылады
Бүгінге дейін 238,9 мың гектар дәнді және дәнді-бұршақты дақылдар жиналып, 265,2 мың тонна астық бастырылды. Сонымен қатар 96,6 мың тонна картоп және 101,6 мың тонна көкөніс пен бақша өнімдері жиналды.
Жиналған өнімді сақтау үшін облыста төрт лицензияланған элеватор және жалпы сыйымдылығы 870,9 мың тонна болатын қоймалар жұмыс істейді. Жалпы, дәнді дақылдардың болжамды түсімі – 332 мың тонна.
Күзгі егін жинау жұмыстарына 23,7 мың тонна дизель отыны бөлінген. Егін жинауға 4 мың трактор, 2,4 мың комбайн және 700 орақ тартылды. Биыл 394 жаңа техника сатып алынып, ауыл шаруашылығы техникасын жаңарту деңгейі 4,5 пайызға жетті. Жыл соңына дейін бұл көрсеткішті 6,5 пайызға дейін жеткізу көзделген. «Кең Дала» және «Кең Дала-2» бағдарламалары аясында облысқа 18 млрд теңге бөлінді.
Тамшылатып суаруға ден қояды
«Приречное» агрофирмасының тәжірибесін ескере отырып, 2028 жылға дейін барлық аудан мен қала маңында кемінде 50 гектар алқапқа тамшылатып суару технологиясымен көкөніс және картоп егу жоспарланды. Бұл жобалар «Ауыл аманаты» бағдарламасы арқылы қаржыландырылады.
Аймақ басшысы жиында күзгі дала жұмыстарын 1 қарашаға дейін аяқтауды, «Кең Дала» және «Кең Дала 2» бағдарламалары аясында бөлінген қаражатты мерзімінде игеруді, ауыл шаруашылығы техникасын жаңарту мен түгендеу жоспарын тиімді орындауды тапсырды. Облыс әкімі өңірдің алдағы үш жылдық дамуында ет және сүт кластерін дамыту мен суармалы егіншілікті кеңейтуге басымдық берілетінін атап өтті.
Өздеріңізге белгілі, Мемлекет басшысы «Үлкен қалалардың жанында азық-түлік белдеуін қалыптастыру керек» деп үнемі айтады. Биылғы Жолдауында да агроөнеркәсіпті дамытуға ерекше тоқталды. Президент айтқандай, азық-түлік белдеуін қалыптастырып, тұрақтандыру қоры негізінде қаланы азық-түлікпен толық қамтамасыз етіп отырған Семейдің іргесіндегі шаруашылықты, осындай кәсіпорындарды қолдауымыз қажет. Күн тәртібінде қаралып отырған мәселе облыс халқын алдағы қыс мезгілінде қажетті азық-түлікпен сапалы қамтамасыз ету бағытындағы басты шара, – деді облыс әкімі.
