Көкпекті ауданында диқандар еңбегін дәріптейтін, ырыс пен берекенің символы саналатын Нан күніне арналған мерекелік іс-шара өтті, деп хабарлайды Tura18.kz.
Жыл сайын өткізілетін дәстүрлі жәрмеңкені аудандық мәслихат депутаты Асыл Сәбитбекқызы ұйымдастырды. Салт-дәстүрге сүйене отырып ұйымдастырған бұл шараға ауданның наубайшылары мен кондитерлері, ауыл тұрғындары мен қонақтар қатысты.
Мерекелік кештің шымылдығы жылы лебізге толы сөздермен ашылып, жүргізушілер қатысушыларды мерекемен құттықтады.
«Нан болса ән де болады» деп халқымыз бекер айтпағандай, шара барысында нанның қадірі мен еңбекқор диқан, наубайшылардың еңбегі ерекше аталып өтті.
Бағдарлама аясында ауданның әр округінен келген шебер наубайшылар мен кондитерлер өз қолдарымен пісірген алуан түрлі нан өнімдерін ұсынған нан көрмесі-жәрмеңкесі өтті. Дастархан үстін алтын түстес, хош иісті, дәмі тіл үйірер нан мен бауырсақтар, самса мен тоқаштар, түрлі тәттілер мен кондитерлік бұйымдар көмкерді.
Мерекелік кеш барысында ән мен би орындалып, қатысушылар көтеріңкі көңіл күйде болды. Аудан әкімінің орынбасары Аслан Танысбаев сөз сөйлеп, адал еңбек иелерін кәсіби мерекемен құттықтап, олардың тынымсыз еңбегіне алғысын білдірді.
Іс-шара соңында ең үздік наубайшылар мен кондитерлерге құрмет көрсетіліп, барша қатысушыларға ыстық ықылас пен ізгі тілектер айтылды. 40 жыл бойы Көкпекті наубайханасында нан пісірген Айгүл Мадиева ханым аудан әкімдігі тарапынан алғыс хатпен марапатталып, бағалы сыйлықтарға ие болды.
Мереке нанның қадірін, еңбектің қасиетін дәріптеген, бірлік пен ризашылық рухындағы жылы әсерге толы жиын болды.
Әмір Бек
