Астана төрінде өткен қазақ күресінен дәстүрлі «Қазақстан Барысы-2025» республикалық турнирінде Абай облысының намысын қорғаған балуан Ерасыл Қажыбаев күміс жүлдегер атанды, деп хабарлайды Tura18.kz.
Биылғы додаға еліміздің барлық өңірінен сайдың тасындай іріктелген кіл мықты балуандар жиылып, «кім мықтыны» анықтады. Байрақты бәсекеге Абай өңірінің атынан өнер көрсеткен Ерасыл Қажыбаев турнир барысында жоғары дайындығы мен шеберлігін паш етіп, барлық қарсыласын айқын басымдықпен ұтты. Тек финалдық белдесуде қарсыласына есе жіберіп алды. Осылайша ол дүбірлі доданың күміс жүлдегері атанды.
Ұлттық күрестің еліміздегі ең мәртебелі сайысын осыған дейін абайлық Айбек Нұғымаров екі мәрте иеленсе, Мұхит Тұрсынов пен Дәурен Нұралинов бір-бір рет жеңімпаз атанған. Сондай-ақ Шалқар Жоламанов пен Саят Шәмшиев «Қазақстан барысының» бірнеше мәрте жүлдегері атанған.
