Астана-Семей трассасында болған жол апатынан Alikhan Bokeikhan университетінің үш студенті қаза тапты. Олар елордада өткен Азия чемпионатынан келе жатқан болатын, деп хабарлайды Tura18.kz.
Абай облысы ПД мәліметінше, 2 қараша күні таңғы сағат 05.45 шамасында Бесқарағай ауданының Жыланды ауылы маңында, Астана-Семей жолында «Toyota Avensis» жеңіл автокөлігі қарсы бағытқа шығып кетіп, «Howa» жүк көлігімен соқтығысқан. Апат салдарынан жеңіл көліктің жүргізушісі мен екі жолаушысы оқиға орнында көз жұмды. Тірі қалған тағы бір жолаушы жедел Семей қаласының ауруханасына жеткізілген.
Ресми ақпаратқа сүйенсек, жол апатынан Alikhan Bokeikhan University студенттері Нұрмағамбет Тұрарбеков, Рефхат Оңдабай және Рустамбек Әбдимәліков қаза тапқан. Ал ауруханаға жеткізілген төртінші адам олардың жаттықтырушысы болған. Барлығы Астанада өткен бирман боксынан Азия чемпионатынан Семейге келе жатқан. Сол жарыста Нұрмағамбет Тұрарбеков бірінші орын алып, Азия чемпионы атанған еді.
Абай облысының полиция департаменті жол апатына қатысты «Көлік құралдарын басқаратын адамдардың жол жүрісі қағидаларын бұзуы, абайсызда екі немесе одан да көп адамның өліміне әкеп соғу» бабы бойынша тергеу басталғанын мәлім етті.
