Абай облысының әкімі Берік Уәлидің төрағалығымен өткен жиында өңірге инвестиция тарту көрсеткіштері мен инвестициялық жобаларды іске асыру барысы талқыланды, деп хабарлайды Tura18.kz порталы облыс әкімінің баспасөз қызметіне сілтеме жасап.
Биыл облыс бойынша негізгі капиталға салынатын инвестиция көлемі 417,7 млрд теңге болды. Бұл былтырғы сәйкес кезеңмен салыстырғанда өсімнің оң динамикасын көрсетеді. Оның ішінде жеке инвестициялар үлесі 73,3 пайызға немесе 267,3 млрд теңгеге жетті. Инвестиция тарту жұмыстарын жүйелі жүргізу мақсатында өңірдегі Ұлттық цифрлық инвестициялық платформаға енгізілген жобалар саны 29-дан 50-ге дейін артқан. Қазір жалпы құны 25,9 млрд теңге болатын 14 инвестициялық жоба жүзеге асырылып жатыр. Нәтижесінде 453 жаңа жұмыс орнын құру көзделген.
Бүгінге дейін жалпы құны 7,3 млрд теңге болатын алты жоба іске қосылып, 182 жаңа жұмыс орны ашылды. Қалған сегіз жоба жыл соңына дейін аяқталмақ.
Жиында облыс әкімі төмен нәтиже көрсеткен аудан әкімдері мен жауапты орынбасарлардан инвестициялық ахуалды жақсарту бағытындағы нақты шараларды баяндауды талап етті.
Аймақ басшысы кәсіпкерлік басқармасына өңірде жүзеге асырылып жатқан және жалпыұлттық пулға кіретін инвестициялық жобалардың орындалуын қатаң бақылауда ұстауды, инвесторларды өңірлік үйлестіру кеңесіне тарту жұмысын күшейтуді тапсырды. Сондай-ақ белсенділігі төмен қалалар мен аудандар бойынша нақты ұсыныстар әзірлеу қажеттігін атап өтті.
Барлық басшылардан жоспарлы көрсеткіштерді толық орындау талап етіледі. Бұл облыстың жалпы рейтингі мен экономикалық дамуына тікелей әсер етеді. Жоспардың орындалуы – өңірдің инвестициялық тартымдылығы мен әлеуметтік-экономикалық тұрақтылығын қамтамасыз етудің басты факторы. Премьер-министр Олжас Бектенов айтқандай: «Егер инвестиция болмаса, даму да болмайды». Сондықтан бұл бағыттағы жұмысты жандандыру қажет, – деді Берік Уәли.
