Жетісу жұрты аяулы перзентін ұлықтады. Биылғы 15 қараша күні Талдықорғанда БАҚ өкілдері арасында Бейсен Құранбекті еске алуға арналған футзалдан дәстүрлі республикалық турнир жоғары деңгейде өтті, деп хабарлайды Tura18.kz.
Биыл бесінші жыл өткізіліп отырған теңбіл доп додасына еліміздің әр аймағынан, Астана мен Алматыдан шығармашыл қауым жиылды. Жиыны сегіз команда жүлдені сарапқа салды. Айта кетейік, жарыс ережесі бойынша биыл алғаш рет турнирге тек журналистер қатысады деген шешім қабылданды. Техникалық қызметкерге қақпаға тұруға рұқсат етілді. Мұндай шешімді республиканың барлық БАҚ өкілдері қуана қолдады рас.
Бұрын көп жарыста журналистер шетте қарап тұрып, «футболистер» доп тебетін. Жетісудің бұл бастамасы өте дұрыс болды. Барлық команданың құрамы, деңгейі шамалас. Бәрінде өзіміз танитын, бірге еңбек етіп жүрген әріптестер. Сондықтан да ойын қызықты, достық рәуіште өтті. Осы игілікті бастаманы үзбей, жалғастыру керек, – деді журналистер бір ауыздан.
Сонымен қызықты әрі тартысты өткен бәскелер нәтижесінде Алматының намысын қорғаған Setanta Kazakhstan командасы чемпион атанды. Белгілі журналист Бек Төлеу бастап келген астаналық Beksport командасы күміс жүлдені қанағат тұтты. Қола жүлде Сыр елінен келген «Ақмешітке» бұйырды. Төртінші орын алған ұжым да олжасыз қалған жоқ. Үздік төрттікті түйіндеген жергілікті «Қарекет» командасы қомақты ақшалай сыйлыққа ие болды. Бейсен Құранбек турнирінің басқа жарыстардан бір ерекшелігі де осы.
Сондай-ақ тамаша өнерімен көзге түскен жекелеген ойыншылар марапатталды. Көп жыл журналистика саласында жемісті еңбек етіп, қазір мемлекеттік қызметтің жүгін арқалап жүрген көкпектілік Дархан Бердібектің өнерін жанкүйерлер жоғары бағалап, оған «Жанкүйер ықыласы» аталымы берілді. «Өскемен» командасы сапында ойнаған ол бастысы жүлде емес, өзара сыйластық, достық қарым-қатынас дейді.
Жарыс әдеттегідей жоғары деңгейде өтті. Сөз жоқ. Жалпы, “турнир өткізсе Жетісу өткізсін” деген сөз бар журналистер арасында. Бұл жолы да сол межеден көріне білді жетісулық әріптестер. Жарыс әділ, ашық, таза болды. Ең бастысы жүлде емес, әріптестер арасындағы өзара сыйластық, Бейсен ағаның рухына тағзым. Жарыстың мақсаты да сол ғой, ұлтым деп өткен ұлды еске алып, өнегелі мұрасын дәріптей отырып БАҚ өкілдерінің басын қосу, достық қарым-қатынасты нығайту, салуатты өмірді насихаттау. Осы тұрғыдан алсақ Бейсен Құранбек турнирі өз миссиясын артығымен орындады, – деді Дархан Бердібек.
Турнирді ұйымдастырып, басы-қасында жүрген белгілі журналист Есболат Айдабосын жарыстың мәніне тоқталды.
Бұл турнир журналистердің бас қосуына, кәсіби байланыс орнатуына мүмкіндік береді. Командалар бір-екі күн күш сынасып, тәжірибе алмасады. Биыл қатысушылардың дайындық деңгейі де өте жоғары. Ал жарыстың жүлде қорына келсек, бірінші орынға 1 миллион теңге, екінші орынға — 700 мың теңге, үшінші орынға — 500 мың теңге, төртінші орынға 200 мың теңге ақшалай сыйлық беріледі. Сондай-ақ Бейсен Құранбектің ұстаздары Сайын Тұрсынов пен Нұртілеу Иманғалиұлы атындағы арнайы жүлделер бар, алты-жеті номинация бойынша марапаттар табыс етіледі, — деді Есболат Айдабосын.
