Абай облысында автомобиль жолдарының жағдайы – халық үшін ең өзекті мәселелердің бірі. Өңір басшылығы жыл сайын жол инфрақұрылымын жаңартып, сапасын жақсартуға бағытталған жұмыстардың көлемін ұлғайтып келеді. Биыл да бұл бағытта бірқатар ауқымды жобалар қолға алынды, деп хабарлайды Tura18.kz.
Облыста жергілікті маңызы бар автомобиль жолдары мен елді мекен көшелерінің жалпы ұзындығы 8052 шақырым болады. Жыл соңына дейін осы жолдардың нормативтік жағдайдағы үлесін 89 пайызға жеткізу жоспарланған.
Биыл жергілікті жолдарды жөндеу, күтіп-ұстау және жобалық құжаттама әзірлеу үшін түрлі деңгейдегі бюджеттерден 35,4 млрд теңге бөлінген. Оның есебінен 430 шақырымды қамтитын жолдарға әртүрлі жөндеу жұмысы жүргізілді. Облыстық маңызы бар жолдардың 109 шақырымы орташа жөндеуден өтті.
Абай облысы аумағынан өтетін республикалық маңызы бар автомобиль жолдарының жалпы ұзындығы — 2176 шақырым. Оның 786 шақырымында бірден 12 ірі жоба жүзеге асырылып жатыр.
Жыл басынан бері республика бойынша осы желіде жұмыс істейтін 12 зауыт 1,631 млн тонна асфальт өндірді. Соның арқасында 390 шақырым жол пайдалануға берілді. Жол құрылысына 8 мердігер компания, 1200 техника және 2000-ға жуық маман жұмылдырылған.
«Жол активтері сапасының ұлттық орталығы» РМК облыстық филиалы жыл басынан бері республикалық, облыстық және аудандық жолдарда, сондай-ақ көше жолы желілерінде орналасқан нысандарға 501 рет шығып, бақылау жүргізген. Нәтижесінде 3304 сынама алынған. Бұл сынамалар жолдың тығыздығынан бастап, асфальт құрамына дейінгі барлық стандарттарға сәйкестігін анықтауға мүмкіндік береді.
Аймақ басшысы жолдардың қазіргі жағдайына тоқталып, бірқатар нақты тапсырма берді. Оның айтуынша, өңірдегі жол сапасы әлі де сын көтермейді.
Қарастырылып отырған мәселе өте маңызды. Өңірдегі жол сапасы сын көтермейтіні рас. Біздің басты мақсат – облыстағы асфальтталған жолдың үлесін арттырып, жол қауіпсіздігін күшейту. Осының бәріне жүйелі жұмыс қажет, – деді облыс әкімі.
