Абай облысының әкімі Берік Уәли бастаған делегация Ресейдің Омбы қаласында өтіп жатқан «Ертіс: достық өзені – даму өзені» VII халықаралық туристік-көліктік форумына қатысты. Іс-шараға Ресей, Қазақстан және Қытайдан жетекші сарапшылар, мемлекеттік орган өкілдері, кәсіпкерлер, кеме қатынасы мен көлік логистикасы саласының мамандары, сондай-ақ Павлодар мен Шығыс Қазақстан облыстарынан делегациялар келді, деп хабарлайды Tura18.kz облыс әкімінің баспасөз қызметіне сілтеме жасап.
Шілде айында Омбы облысы Үкіметінің вице-премьері Андрей Шпиленко бастаған делегация Абай облысына келген. Кездесу нәтижесінде Ертіс өзенін бірлесіп пайдалану мен дамыту туралы хаттамаға және 2025–2028 жылдарға арналған халықаралық және сыртқы экономикалық байланыстар жоспарына қол қойылды. Құжат туризм саласындағы бірнеше жобаны қамтиды.
Форумның пленарлық отырысында Берік Уәли Абай облысының келісімдерді жүзеге асыруға дайын екенін айтып, өңірдің өндірістік және туристік әлеуетін таныстырды. Омбы облысының губернаторы Виталий Хоценкоға көрсеткен қонақжайлық үшін алғыс білдірді.
Облыс әкімі Ресей мен Қазақстанның тарихи байланыстары мен экономикалық әріптестігін атап өтіп, трансшекаралық туристік маршруттар құруды, ортақ бренд аясында ілгерілету мүмкіндігін ұсынды. Сондай-ақ гидтерді даярлау, мәдени туризм мамандарын оқыту, бірлескен көрмелер, фестивальдер, тарихи реконструкциялар ұйымдастыру және тәжірибе алмасуды жандандыру қажеттігін айтты.
Ресей – Қазақстанның негізгі сауда серіктестерінің бірі және еліміздің экономикасына үлес қосушы жетекші инвесторлардың алғашқы үштігіне кіреді. Қос мемлекетте де инвесторларды қолдау үшін барлық қажетті жағдай жасалып, бизнес жүргізуге қолайлы орта қалыптасқан. Қазақстан Президенті Қасым-Жомарт Кемелұлы Тоқаев атап өткендей: «Қазақстан мен Ресей арасындағы қарым-қатынастардың өткен тарихы бай, болашағы жарқын». Біздің өңір Ресейдің шекаралас облыстарымен тығыз байланыс орнатқан. Сауда-экономикалық қатынастар қарқынды дамып, мәдениет пен білім беру салаларындағы ынтымақтастық нығайып келеді. Өңірлеріміздің тарихи мұрасын ескере отырып, трансшекаралық туристік маршруттар құруды және оларды танымал халықаралық бағыттар деңгейінде танылатындай бірлескен бренд аясында ілгерілетуді ұсынамыз. Біз туристік компаниялар үшін Ертіс маңымен ғана шектелмей, облысымыздың бүкіл аумағын қамтитын ақпараттық турларды ұйымдастыруға дайынбыз, — деді облыс әкімі.
Форум қорытындысында Берік Уәли мен Виталий Хоценко мәдениет саласындағы ынтымақтастық жөніндегі келісімге қол қойды.
Абай облысының Ресеймен тауар айналымы артып келеді: биылғы үшінші тоқсанда көрсеткіш 823,4 млн АҚШ долларын құрап, былтырғы деңгейден екі есе жоғары болды. Өңірде ресейлік капиталдың қатысуымен 178 кәсіпорын жұмыс істейді.
Форум алдында облыс делегациясы Ертіс өзеніне арналған фотокөрмені, Омбы ұйымдарының иммерсивті шоуын, жергілікті дизайнерлер көрсетілімін және туристік көрмені тамашалады.
