Абай облысында агроөнеркәсіп кешенін дамытуға бағытталған ірі инвестициялық жоба іске асырылмақ. Бүгін облыс әкімі Берік Уәли «Harvest Agro Holding» жауапкершілігі шектеулі серіктестігінің директоры Дәулет Увашев бастаған делегациямен кездесті, деп хабарлайды Tura.kz порталы облыс әкімінің баспасөз қызметіне сілтеме жасап.
Кездесу барысында өңірде су үнемдеу технологияларын енгізу арқылы ауыл шаруашылығын дамытуға арналған инвестициялық жобаны жүзеге асыру мәселелері талқыланды. Жобаның жалпы құны – 34 миллиард теңге.
Жоба аясында жер асты суларын тиімді пайдалану негізінде су үнемдеу технологияларын енгізу арқылы жайылым және тыңайған жерлерді кезең-кезеңімен суармалы ауыл шаруашылығы алқаптарына айналдыру көзделіп отыр. Аталған жоба өңірлік үйлестіру кеңесінде қаралып, инвестициялық жоба ретінде мақұлданған. Қазіргі уақытта жер учаскесін рәсімдеу жұмыстары жүргізілуде.
Инвесторлар құжат рәсімдеу жұмыстары аяқталған жағдайда жобаны Мақаншы ауданында іске қосуға дайын екендерін жеткізді. Сонымен қатар, ауыл шаруашылығы өнімдерін қайта өңдеу зауытын салу және бизнестің әлеуметтік жауапкершілігі аясында көпфункциялы спорт кешенін тұрғызу жөнінде ұсыныстарын білдірді.
Облыс әкімі жобаның өңір үшін стратегиялық маңызға ие екенін атап өтті.
Сіздер бұған дейін облысымызға келіп, жобаларыңызды таныстырған болатынсыздар. Сол кезде біз барлық қажетті қолдауды көрсетуге дайын екенімізді айттық. Бұл – өңір үшін маңызды инвестициялық бастама. Оның іске асуы екі тарапқа да оң нәтиже береді деп сенемін. Абай облысының әкімдігі заң аясында барлық қажетті қолдауды көрсетеді, – деді Берік Уәли.
Айта кетейік, 2025 жылы Астана қаласында өткен KGIR-2025 – жаһандық инвестициялар жөніндегі VIII қазақстандық дөңгелек үстел форумы аясында Абай облысы мен «Harvest Agro Holding» компаниясы арасында ауыл шаруашылығын дамыту және суару технологияларын енгізу бағытында инвестициялық меморандумға қол қойылған болатын.
Жоба шеңберінде кешенді инженерлік-геологиялық және агрохимиялық зерттеулер жүргізу, суару және су алу жүйелерін жобалау мен орнату, энергетикалық және инженерлік инфрақұрылым тарту, сондай-ақ ауыл шаруашылығы өндірісін жолға қою жоспарланған.
