Семейдегі Шәкәрім университетінде көп жыл бойы қаңырап, кәдеге жаратылмай тұрған бассейн жаңартылып, іске қосылды. Заманауи нысанның лентасы оқу ордасының №1 Спорт кешенінде дәстүрге айналған спартакиаданың салтанатты ашылуымен қатар қиылды, деп хабарлайды Tura18.kz.
Студенттер қаласы атанғанын Семейде білім алып жатқан жастардың игілігіне берілген бұл спорт нысанында барлық қажетті жағдай жасалған.
Шәкәрім университетінің жылдар бойғы қалыптасу кезеңін жетік білетін ардагер ұстаз Анатолий Сидельниковтың спартакиаданың ашылу салтанатында бассейн орналасқан ғимарат тарихына да тоқталды. Ардагердің айтуынша, бұл спорт кешені осыдан 46 жыл бұрын студенттер мен қала тұрғындарының бірлескен еңбегімен салынған.
1980 жылдың қыркүйегінде жүзу бассейні іске қосылып, осы кешенде қалалық, облыстық, республикалық, тіпті, 1982 жылы Бүкілодақтық деңгейдегі жарыстар өткізілді. Ол кезде бұл дене шынықтыру саласы бойынша облыстағы жалғыз кешен болатын. Бүгінгі жаңғыртылған нұсқасын көріп, шынымен де таңғалып тұрмын. Жөндеу жұмыстары сапалы жүргізілген, кешеннің жаңарғанына көңілім толды,- деді қарт ұстаз ағынан жарылып.
Ұзақ жылдар бойы түрлі заман құбылысының әсерінен қолданыстан шығып қалған жүзу бассейні 2025 жылы күрделі жөндеуден өтіп, қайта іске қосылғаны университет студенттері үшін жыл басталғандағы үлкен сый болғаны даусыз.
Бұл бассейн студенттердің денсаулығын жақсартып, спортқа құштарлығын арттыруға оң әсерін тигізеді деп ойлаймын. Жүзуді меңгеру арқылы түрлі деңгейдегі жарыстарға қатысуға ұмтылатын жастарымыздың қатары арта түссе, тіптен, тамаша ғой. Мұнда тек спортшы студенттеріміз ғана емес, белгіленген кестеге сай келіп, жүзуді үйренгісі келетін жастарға да мүмкіндік бар, — деді жаттықтырушы, бапкер Диас Әлімбекұлы.
Жалпы аумағы 25х14 метрді құрайтын бассейн заманауи талаптарға сай жаңғыртылып, алдағы уақытта университет қауымы мен қала тұрғындарының игілігіне қызмет етпек. Жүзу нысанында талапқа сай ауа температурасының сақталып, судың құрамы үнемі бақылануы коменданттың тиісті міндетінде. Бассейнге университет студенттері, оқытушылық құрамдағы ұстаздар және осы оқу орнының ардагерлерінің де белгіленген уақытта келіп тұруына болады.
Сонымен қатар осынау спорт кешенінде теннис, воллейбол, шахмат сияқты спорт түрлерімен айналысатын студент жастардың уақытын тиімді өткізуіне жол ашық.
Әмір Бек
