Семейде көше тазалығы мен абаттандыру жұмысы қарқынды түрде жалғасып жатыр. Қала аумағын ретке келтіретін коммуналдық қызметтер күшейтілген режимге көшірілген. Бүгінде тазалық шараларына 30-ға жуық арнайы техника мен 120-ға тарта жұмысшы жұмылдырылған, деп хабарлайды Tura18.kz.
Мамандардың айтуынша, жүргізіліп жатқан жұмыстар негізгі жолдарды қамтып қана қоймай, жаяу адамдар жүретін тротуарлар, қоғамдық көлік аялдамалары, саябақтар мен демалыс аймақтары, сондай-ақ тұрғын үйлерге іргелес аумақтарды да толық қамтиды. Бұл шаралар қала келбетін жақсартып, тұрғындарға қолайлы әрі қауіпсіз орта қалыптастыруға бағытталғанын атап өту керек.
Қала көшелерін тазалау және абаттандыру жұмысы бекітілген жоспарға сәйкес кезең-кезеңімен тәулік бойы жүзеге асырылып жатыр. Түнгі уақытта арнайы техникалар негізгі магистральдарды тазаласа, күндіз жұмысшылар қоғамдық орындар мен аумақтарды ретке келтіруге басымдық береді.
Жауапты мекемелер қала тұрғындарын тазалықты сақтауға және ортақ мүлікке ұқыпты қарауға шақырады. Себебі, қаланың көркі мен тазалығы – коммуналдық қызметтердің ғана емес, әрбір тұрғынның ортақ жауапкершілігі.
