Бүгін Абай облысының әкімі Берік Уәли өңір тұрғындарына арнайы бейнеүндеу жасап, «Таза Қазақстан» бағдарламасы аясында жалпыөңірлік тазалық жұмыстарының жалғасатынын жариялады. Аймақ басшысы тазалық шаралары бір реттік науқан емес, күнделікті өмір салтына айналуға тиіс мәдениет екенін атап өтті, деп хабарлайды Tura18.kz.
Мемлекет басшысы Қасым-Жомарт Кемелұлы Тоқаев «Қалалар мен ауылдардың сәулетті, саябақтар мен ауланың таза болуы, ең алдымен, басқаға емес, өзімізге керек», – деп баршамызға ортақ міндет жүктеген болатын. Аймақ экономикасы, өнері мен мәдениеті, экологиясы мен тазалығы – баршамызға ортақ. Абай облысы – ұлы тұлғаның атымен аталған, тарихы терең, табиғаты көркем өңір. Бұл – біздің ортақ үйіміз. Оны таза, жайлы, көрікті етіп ұстау – әрқайсымыздың азаматтық борышымыз, – деді Берік Уәли.
Аймақ басшысы облыстың тазалығы әкімдік пен коммуналдық қызметтің ғана емес, әрбір азаматтың, әрбір отбасының жауапкершілігі екенін айтып, бұл іске кәсіпкерлерді де белсенді атсалысуға шақырды.
Біз кәсіпкерлерден өзінің дүкені, қонақ үйі, тамақтану орындары, қысқасы, бизнес нысандары иелерінен өз мекемесінің айналасын таза ұстауды талап етеміз. Біз полиция департаменті мен аудан-қала әкімдеріне тиісті тапсырма бердік. Бұл талапты орындамаған кәсіпкерлерді жауапқа тартып, айыппұл салатын боламыз. Алыптар түлеген киелі топырақтың ажарына әр беру – әрқайсымыздың қасиетті борышымыз! Баршаңызды жалпыөңірлік сенбілікке белсенді қатысуға шақырамын. Бастаманы барлығыңыз былтырғыдай қолдайды деп сенемін, – деді облыс әкімі.
Айта кетейік, былтыр облыста өткен жалпыөңірлік сенбілік аясында 349 мыңнан астам тұрғын тазалық жұмыстарына қатысып, 52 мың тонна қоқыс шығарылды. 70 мыңнан астам көшет отырғызылып, 191 заңсыз қоқыс орны жойылды. Сонымен қатар, «Үлгілі ауыл» байқауы ұйымдастырылып, ауылдың инфрақұрылымын жақсарту мен тазалығын сақтау жұмыстарына қатысып, белсенділік танытқан 20 ауылға 20 трактор табысталды.
Облыс әкімі бейнеүндеуінің толық мәтінін Абай облысы әкімдігінің сайтынан оқи аласыздар.
