Семей қаласы табиғатты қорғау мен экологиялық мәдениетті қалыптастыру жолында жаңа қадам жасады. Абай облысының әкімі Берік Уәлидің бастамасымен, өңірде «Таза Қазақстан» экологиялық акциясы аясында жалпықалалық сенбілік өткізілді, деп хабарлайды Tura18.kz.
Сенбілікке қала әкімі Әділет Қожанбаев бастаған мемлекеттік қызметшілер, ірі және орта бизнес өкілдері, еріктілер мен жергілікті тұрғындар белсене қатысты. Қала тазалығын сақтау үшін ұйымдастырылған шараға қатысушылар тек орталық көшелердің тазалығымен шектелмей, шеткері аймақтар мен елді мекендерді де қамтыды.
ЭКОЛОГИЯЛЫҚ МӘДЕНИЕТ ҚАЛЫПТАСЫП КЕЛЕДІ
Сенбіліктің басты мақсаты — қала тұрғындарының қоршаған ортаға деген жанашырлығын көрсету, экологиялық мәдениетті дамыту, сондай-ақ, қаланың санитарлық жағдайын жақсарту болды. Акция барысында қатысушылар қаланың әртүрлі аумақтарынан күл-қоқыстарды жинап, көгалдандыру жұмыстарын жүргізді. Қала шекарасында орналасқан жасыл аймақтар ретке келтіріліп, тазалық жұмыстары мұқият жүргізілді. Бұл бастама қала тұрғындары арасында экологиялық жауапкершілікті арттыруға және қоршаған ортаға қамқорлық көрсетуге мүмкіндік туғызды.
ІРІ БИЗНЕС ӨКІЛДЕРІ БЕЛСЕНДІ
Аймақ басшысының тапсырмасына сәйкес, «Таза Қазақстан» экологиялық бағдарламасының іске асуына қаладағы ірі, орта және шағын кәсіпкерлік қолдау көрсетті. Акцияға қатысқан бизнес нысандары арасында «Силикат» ЖШС, «Семей цемент зауыты» ЖШС, «УК «Юнис» ЖШС, «Gaz&Мұнай» ЖШС, «EcoPetrol» ЖШС, «Эйкос» ЖШС сияқты көптеген ірі кәсіпорындар болды. Сонымен қатар, «Bayazit Life», «Park City» СҮ, «Апрель» СҮ, «Avenu» СҮ, «Adalin» СҮ, «Asima» СҮ және «Smart» СҮ сияқты сауда орталықтары бар. Бұлардың бәрі сенбілікке атсалысып, тазалықты сақтауға үлес қосты. Олар аумақты тазартумен қатар, жаңа егілген көшеттерді күтіп-баптап, табиғатты қорғауға атсалысты.
20 МЫҢНАН АСТАМ АДАМ ҚАТЫСТЫ
Семей қаласының тұрғындары бұл сенбілікті ерекше құлшыныспен өткізді. Оған 20 мыңнан астам адам қатысып, шаһардың тазалығына үлес қосты. Бұл шара семейліктердің экологиялық мәдениетке деген көзқарасын өзгертіп қана қоймай, қоршаған ортаға қамқорлық танытуға түрткі болды.
Сенбілік шаһардың экологиялық жағдайын жақсартуға үлес қосып, тұрғындарға табиғатпен үндес өмір сүрудің маңызын ұғындырды. Аталмыш шараның нәтижесі мен оның қала тұрғындарына берер пайдасы көп болғанын айту керек. Жергілікті әкімдік пен қоғам өкілдері алдағы уақытта да осындай игі бастамаларды іске асырып, қала тазалығына барынша көңіл бөлуге ниетті.
