Семей қаласында ауа райының тұрақтануына байланысты жылыту маусымын тоқтату туралы шешім қабылданды. Ертең, 21 сәуірден бастап қалада жылу беру біртіндеп тоқтатылады, деп хабарлайды Tura18.kz.
Қаланың коммуналдық қызметінің мәліметінше, 2025–2026 жылдардағы жылыту маусымы штаттық режимде өткен. Жылу жүйелерінде барлық қажетті техникалық және жөндеу жұмысы уақтылы орындалып, жылу көздері қалыпты режимде істеді.
Жылыту маусымын аяқтау тәртібі Абай облысының әкімдігі бекіткен қағидаларға сәйкес жүзеге асырылады. Белгіленген талап бойынша, сыртқы ауаның орташа тәуліктік температурасы +10°C-тан жоғары болса және бірнеше күн бойы тұрақты сақталған жағдайда жылыту маусымын тоқтату туралы шешім қабылданады.
Қала билігінің хабарлауынша, жылу беру тоқтатылғаннан кейін тұрғын үйлерге ыстық су беру кезең-кезеңімен қалпына келтіріледі. Бұл ретте 601 көпқабатты тұрғын үй, яғни 40 мыңнан астам абонент ыстық сумен қамтамасыз етіледі.
Қалалық қызметтер тұрғындардан түсіністік танытуды сұрайды. Жауапты орындар жылу жүйелерін жөндеу қауіпсіз әрі жоспарлы түрде жүргізіліп, мерзімінде аяқталуын қатаң бақылауда ұстайды.
