Шығыс Қазақстан облысының Күршім ауданында туризм саласын дамытуға бағытталған бастамалар қарқын алып келеді. Өңірде мемлекеттік қолдау құралдары арқылы жаңа демалыс орындарын ашу, туристік инфрақұрылымды жетілдіру және келушілерге қолайлы жағдай жасау көзделіп отыр.
Аудан әкімдігінің мәліметінше, «Ауыл аманаты» бағдарламасы аясында туризм бағыты бойынша жалпы құны 27 миллион теңгені құрайтын екі жоба мақұлданған. Бұл жобалар ауданның туристік әлеуетін арттырып қана қоймай, жергілікті тұрғындарды жұмыспен қамтуға да мүмкіндік береді деп күтілуде.
Сонымен қатар биыл «Атамекен» микроқаржы ұйымына «Құлын» учаскесінде жаңа туристік нысан салу жөнінде өтінім жолданған. Жоба аясында қонақ үйлер тұрғызу жоспарланып отыр. Бұл өз кезегінде өңірге келетін туристер санының артуына және қызмет көрсету сапасының жақсаруына ықпал етпек.
Күршім ауданының әкімі Мейіржан Әлбековтің айтуынша, бүгінде «Ауыл аманаты» бағдарламасы шеңберінде қаралып жатқан жобалардың жалпы құны 98,6 миллион теңгеге жеткен. Оның сөзінше, аудан экономикасында туризмнің үлесін арттыру басты міндеттердің бірі саналады.
Соңғы жылдары аудан аумағында туристерді қабылдауға арналған инфрақұрылым кезең-кезеңімен қалыптасып келеді. Мәселен, 2024 жылы кәсіпкер А. Алексеев Құйған ауылы маңында қонақ үйлер кешенінің құрылысын бастаған болатын. Қазіргі таңда бұл нысандардың құрылысы толық аяқталып, пайдалануға дайын күйге жеткізілген.
Өңірдегі ірі жобалардың бірі – Бұқтырма су қоймасындағы көпірге жақын аумақта жаңа демалыс паркінің салынуы. Жоспар бойынша бұл жерде сегіз гектар аумақты қамтитын заманауи рекреациялық аймақ бой көтереді. Қазіргі уақытта көпір құрылысы кезінде пайдаланылған уақытша нысандарды демонтаждау жұмыстары жүргізілуде. Демалыс паркінің жобалық құжаттамасы әзірленіп қойған, ал абаттандыру жұмыстары 2026 жылы басталмақ.
Жаңа саябақта жолаушылар мен туристерге қызмет көрсететін этноауыл элементтері қарастырылған. Атап айтқанда, ұлттық нақыштағы киіз үйлер тігіліп, жергілікті кәсіпкерлерге арналған сауда орындары ашылады. Бұған қоса, демалушылар үшін балық аулау құралдарын жалға беру қызметі ұйымдастырылмақ.
Жобаның тағы бір ерекшелігі – астротуризм бағытын дамытуға көңіл бөлінуі. Осы мақсатта парк аумағында арнайы астроалаң салу жоспарланған. Мұнда келушілер түнгі аспанды бақылап, жұлдыздарды тамашалай алады. Мамандардың пікірінше, табиғаты таза әрі жарық ластануы төмен аймақтар мұндай туризм түрін дамытуға өте қолайлы.
Аудан басшылығының мәліметінше, алдағы уақытта туристер арасында кеңінен танымал бола қоймаған бірқатар табиғи нысандардың да инфрақұрылымы жетілдіріледі. Солардың қатарында ерекше табиғи келбетімен ерекшеленетін Шекелмес мүйісі мен Қиын Керіш шатқалы бар. Бұл аумақтарға апаратын жолдарды жақсарту, демалыс орындарын ұйымдастыру және ақпараттық навигация жүйесін дамыту мәселелері қарастырылуда.
Мамандардың айтуынша, қолға алынған жобалар Күршім ауданын Шығыс Қазақстандағы тартымды туристік бағыттардың біріне айналдыруға мүмкіндік береді. Ал инфрақұрылымның дамуы жергілікті кәсіпкерліктің өркендеуіне және өңір экономикасының өсуіне қосымша серпін бермек.
Мирас Өтей
