Қытай Халық Республикасының Шыңжаң ұйғыр автономиялық өлкесіне қарасты Алтай қаласында өткен «Үлкен Алтай – 2026» халықаралық субөңіраралық ынтымақтастық конференциясы аясында 20-ға жуық шетелдік инвестормен B2B форматындағы кездесулер ұйымдастырылды, деп хабарлайды Tura18.kz порталы облыс әкімінің баспасөз қызметіне сілтеме жасап.
Кездесуге Абай облысының әкімі Берік Уәлидің атынан облыстық мәслихат төрағасы Шалқар Байбеков, кәсіпкерлік және индустриялық-инновациялық даму басқармасының басшысы Айбек Рахымбеков және бірқатар салалық басқармалардың жетекшілері қатысты.
Жиын барысында инвесторлар өз жобаларын таныстырып, сауда, құрылыс, медицина, қалалық инфрақұрылым, спорт және балалар алаңдарын салу, құрылыс материалдары мен оптоэлектрондық құрылғылар өндірісі бағыттарындағы ұсыныстарын ортаға салды.
Кездесу қорытындысы бойынша Абай облысының басқармалары, аудан әкімдіктері, «Семей» әлеуметтік-кәсіпкерлік корпорациясы, Қытай компаниялары мен білім беру ұйымдары арасында жалпы саны 7 ынтымақтастық құжатына қол қойылды. Оның ішінде 6 инвестициялық меморандум және білім беру саласындағы 1 негіздемелік келісім бар.
Қол қойылған құжаттар аясындағы жалпы инвестиция көлемі 76,3 млрд теңгені немесе 146,8 млн АҚШ долларын құрайды.
Меморандумдарға сәйкес өңірде гидроэлектр станциясы мен алюминий зауытын салу, цементтен жасалған құрылыс бұйымдарын шығару, электр сымдары мен кабель өнімдерін өндіретін кәсіпорын ашу жоспарланған. Сонымен қатар Семей қаласындағы Smart City шағын ауданының инфрақұрылымын дамыту, стандартталған спорт және балалар ойын алаңдарын орнату, Үржар ауданында заманауи жылыжай кешенін салу, энергия үнемдейтін электр жылыту жүйелерін енгізу және жаңа энергетика саласындағы жобаларды жүзеге асыру көзделіп отыр.
Конференция аясында Қытайдың Шыңжаң Алтай кәсіптік-техникалық колледжі мен Семейдегі Шәкәрім университеті арасында ынтымақтастық жөніндегі негіздемелік келісімге де қол қойылды. Құжат кәсіптік білім беру саласындағы байланысты дамытуға, оқытушылар мен студенттер алмасуын жолға қоюға, сондай-ақ ғылыми және мәдени ынтымақтастықты нығайтуға бағытталған.
Айта кетейік, өткен жылы дәл осы «Үлкен Алтай» халықаралық конференциясы аясында Абай облысының қала және аудан әкімдіктері, басқармалар, кәсіпорындар мен қытайлық инвесторлар арасында жалпы құны 1,5 млрд АҚШ долларын құрайтын 15 меморандумға қол қойылған болатын.
