Қазақстанда зейнетақы төлемдерінің мөлшері артып келеді. Қазір елдегі жиынтық зейнетақының орташа мөлшері 143 502 теңге болды. Оның ішінде ынтымақты зейнетақы – 95 814 теңге, ал базалық зейнетақы – 47 688 теңге, деп хабарлайды Tura18.kz.
Еңбек және халықты әлеуметтік қорғау министрлігінің мәліметінше, жыл басынан бері 2,48 миллион зейнеткерге 1,7 триллион теңгеден астам қаржы төленген. Оның 564,7 миллиарды базалық зейнетақыға, ал 1 триллион 181,2 миллиарды ынтымақты зейнетақыға бағытталған.
Биылғы 1 қаңтардан бастап зейнетақылар инфляция деңгейінен жоғары пайызбен өсті. Атап айтқанда, базалық зейнетақы – 6,5%-ға, ынтымақты зейнетақы 8,5%-ға артты. Бұл Мемлекет басшысының 2023 жылдан басталған кезең-кезеңімен өсіру жөніндегі тапсырмасына сәйкес жүзеге асырылды.
Сонымен қатар базалық зейнетақы мөлшері азаматтың зейнетақы жүйесіндегі еңбек өтіліне байланысты есептеледі. Өтілі 10 жылдан асқан әр жыл үшін оның көлемі 2 пайызға артып отырады. Ал 30 жыл еңбек өтілі бар азамат ең жоғары – ең төмен күнкөріс деңгейінің 110%-ына тең базалық зейнетақы алады.
Министрлік азаматтарды зейнетақы жарналарын тұрақты әрі толық көлемде аударып отыруға шақырады. Себебі бұл болашақта жоғары мөлшерде зейнетақы алудың кепілі саналады.
