Бүгін облыс әкімі Берік Уәлидің төрағалығымен кеңейтілген аппараттық кеңес өтті. Жиында облыстағы заңсыз құрылыс нысандары бойынша жүргізіліп жатқан жұмыстар, 2025 жылдың қаңтар-мамыр айларындағы өңірдің әлеуметтік-экономикалық дамуы қорытындылары, биылғы бес айда бюджеттің игерілу мәселесі қаралды. Кеңеске облыстық басқарма басшылары, өңірлік департамент жетекшілері, ал аудан және қала әкімдері бейнережимде қатысты.
Облыстағы заңсыз құрылыс нысандары бойынша жүргізіліп жатқан жұмыстар туралы мемлекеттік сәулет-құрылыс бақылау басқармасының басшысы Сайлауғалы Байназаров, сәулет, қала құрылысы және жер қатынастары басқармасының басшысы Әнуар Бейсенов, Семей қаласы әкімінің міндетін атқарушы Бекжан Бапышев баяндады.
Мемлекеттік сәулет-құрылыс бақылау басқармасының мәліметінше, камералдық бақылау барысында облыста 34 заңсыз көп қабатты тұрғын үй тіркеліп, оның 12-сі бойынша сот шешімі шыққан, 15-іне тиісті нұсқама берілген. Бұл үйлерден 547 отбасы баспана сатып алған. Облыс әкімінің тапсырмасымен құрылған ведомствоаралық комиссияның нәтижесінде 310 отбасы заңды мәртебеге ие болып, баспаналарын рәсімдеуге мүмкіндік алды.
Жиында Аягөз, Үржар, Бесқарағай және Мақаншы аудандарындағы сапасыз салынған тұрғын үйлер мәселесі туралы да айтылды. Аймақ басшысы аталған аудандардың әкімдеріне анықталған кемшіліктерді жоюды, мемлекеттік сәулет-құрылыс бақылау басқармасына заңсыз салынған тұрғын үйлерге ғана емес, барлық құрылыс нысандарына талдау жасауды, Семей қаласы әкімінің міндетін атқарушы Бекжан Бапышевқа заңсыз салынған тұрғын үйлердің тұрғындарымен түсіндіру жұмыстарын жүргізуді, ал орынбасары Серік Төленбергеновке аталған мәселелерді жеке бақылауға алуды тапсырды.
Облыс аумағында бірде-бір заңсыз нысанға жол бермеу қажет. Басқарма басшылары мен әкімдер бюджет есебінен жүзеге асырылып жатқан құрылыс нысандарының сапасын және жұмыстардың уақтылы атқарылуын қамтамасыз ету қажет. Жеке бақылауға алыңыздар. Біздің облыста құрылыс жұмыстарын жүргізу мерзімі шектеулі. Мердігерлерге жағдай жасаудың орнына, олардан қажет болса екі-үш ауысыммен жұмыс жүргізуді талап етіңіздер. Биыл облыста басталатын құрылыс нысандары көп. Сондықтан бұл бағыттағы жұмыс қарқынын ширату керек, — деді облыс әкімі.
Абай облысы әкімінің баспасөз қызметі
