Абай облысының әкімі Берік Уәли жұмыс сапарымен Үржар ауданына барып, ауылдағы ағайынның тыныс-тіршілігімен танысты. Бұл туралы ол әлеуметтік желідегі парақшасында жазды, деп хабарлайды Tura18.kz.
Айта кету керек, Берік Уәли аймақ тізгінін қолға алған төрт айда Үржар ауданына үшінші рет келіп отыр және осы жолы бұған дейін өзі бармаған Лайбұлақ, Жоғарғы Егінсу, Жанай, Барқытбел ауылдарын аралады.
Аймақ басшысы алдымен Лайбұлақ ауылындағы жаңадан салынған медициналық пунктті көріп, тезірек іске қосуды тапсырды.
Бүгінде Жоғарғы Егінсу ауылында 100 орындық мәдениет үйінің құрылысы жүргізіліп жатыр. Облыс әкімі құрылысы екі жылдан астам уақытқа созылып кеткен ғимаратты тезірек халық игілігіне беруді тапсырды және оны тікелей қадағалап отыратынын ескертті. Сондай-ақ бұл ауылда жаңа медициналық пункт бой көтерді. Ауыл тұрғындары мұнда 60 жылдан бері жаңа ғимарат салынбағанын айтты.
Жанай ауылында биыл бес бірдей көшеге асфальт төселді. «Ұлттық сапа орталығы» мамандарымен бірге жасалған жолдың сапасын тексердім. Жалпы биыл Үржар ауданының төрт елді мекеніндегі 18 көшеде орташа жөндеу жүргізіледі. Осы ауылдың тумасы Серікбол Омаров жеке қаражатына спорт модулін салып жатыр екен. Нысанды көрдім. Ауылдастарының спортпен айналысуына жағдай жасаған азаматтың бастамасы көпке үлгі, – деп жазды Берік Уәли
Бұдан кейін облыс әкімі Барқытбел ауылына ат басын бұрып, құрылысы 2021 жылы басталып, әлі аяқталмаған су құбыры желілерінің жағдайымен танысты. Жобаны толық аяқтау үшін қаржы бөлу мәселесін қарастыратын болды. Өйткені ауыл тұрғындары таза ауызсуды көп жылдан бері күтіп жүр.
Таскескен ауылында белгілі меценат, туған ауылының шынайы жанашыры Талғат Сақанның ұйымдастыруымен «Ауыл – ел бесігі» фестивалінің шымылдығы түрілген. Салтанатты шараға аймақ басшысы қатысып, сөз сөйледі.
Бүгінде Талғат Сақанның демеушілігімен Таскескенде бірнеше әлеуметтік маңызы бар жоба іске асырылып жатыр. Былтыр екі көшеге асфальт төселіп, ауылда 100 орынға арналған балабақша құрылысы басталды.
