Абай облысының Мақаншы ауылында жалпы аумағы 2 гектарды қамтитын бес қабатты қонақүй кешенінің құрылысы басталды, деп хабарлайды Tura18.kz.
Жобаның құны – 1,5 млрд теңге. Құрылысты аяқтау 2026 жылдың II тоқсанына жоспарланған.
Нысанның іргетасын қалау рәсіміне Абай облысының әкімі Берік Уәли қатысып, бұл жоба өңірлік туризм мен экономикаға серпін беретінін атап өтті.
Мақаншының тұрған жері логистикалық тұрғыдан өте қолайлы. Біздің облыстың қақпасы, Қытай Халық Республикасымен шектеседі. Бақты кеден бекеті бар. Осы мүмкіндікті тиімді пайдалануымыз керек. Салынатын қонақ үй кешені Мақаншы ауданының дамуына үлкен серпін беретіні сөзсіз. Бұл – өңірге құйылып отырған ауқымды инвестиция. Оны тиімді пайдалансақ, ауданның өсіп-өркендеуіне, туризмнің дамуына үлкен көмек болмақ. Құрылыс жұмыстарының сапалы әрі белгіленген мерзімде аяқталуын қадағалаймыз. Жергілікті әкімдік тарапынан барлық қолдауды көрсетеміз,- деді аймақ басшысы.
Қонақ үйде 108 бөлме, мейрамхана, мәжіліс залдары, сауықтыру орталықтары және кең вестибюль қарастырылған. Сонымен қатар 100-ге жуық жаңа жұмыс орны ашылмақ.
Аймақ басшысының айтуынша, Мақаншының шекаралық және логистикалық артықшылықтары жобаны іске асыруға мүмкіндік беріп отыр. Қонақүй тек Мақаншы үшін ғана емес, Үржар, Аягөз және Таскескенге келетін туристер үшін де маңызды инфрақұрылым нысанына айналмақ.
