«Көркейген өлке – Көкпекті» спорт және мәдениет фестивалі аясында республикалық бәйге өтті. Толағай тауының бөктері желмен жарысқан тұлпарлар тұяғының дүбіріне толып, атсүйер қауымның айқай-шуына ұласты. Бағы мен бабы қатар шапқан жүйріктер алқалы топтың құрмет—қошеметіне бөленді, деп хабарлайды Tura18.kz.
Бәйгенің төресі – аламан. Бұл жолғы аламанның жөні тым бөлек еді. «Толағай тұлпары» деген атауға ие ат жарысы Ұлы Жеңістің 80 жылдық мерейтойына орай 80 шақырым қашықтыққа созылды. «Жылқыда да жылқы бар қазанаты бір басқа» демекші, болат тұяқ, қамыс құлақ, тоқпақ жал қазақтың жабылары топтан озып, олжа салған сәт те осы болды. Ұлы аламанның бас жүлдесіне жеңіл автокөлік тігілді. Дәлірек айтсақ, Ақсуат ауданының атынан Тастекеевтер әулеті 80 шақырым бәйгенің бас жүлдесіне «Changan X5» маркалы жеңіл мәшін қойды. Одан бөлек жеті орынға дейін қомақты жүлде тағайындалды. Аттың тері мен шабандоздың еңбегі еш кетпеді.
Ұзаққа талмай шапқан шын жүйріктердің ішінен Көкпекті ауданының «Көксала» атты тұлпары суырылып шығып, мәреге алдымен жетті. Сөйтіп Ақсуаттық атымтай әулет Тастекеевтердің көлігі той иелерінде қалды.
Сонымен қатар 5 шақырымдық тай жарысына қатысқандар да сый-құрметсіз қалған жоқ. Бұл бәйгеде «Көкпекті» ауыл шаруашылық қоры бес орынға дейін жүлде тағайындады.
15 шақырымға созылған топ бәйгенің бас жүлдесіне Көкпекті ауданы, Биғаш ауылының тумалары, белгілі кәсіпкерлер Қайрат және Қайырлы Көпесовтер автокөлік тікті. Бас жүлде Алматы қаласынан келген «Қамбарқасқа» атты сәйгүлікке бұйырды. Қылқұйрықтың бапкері – Ержан Ақтасов, ал шабандозы – Абзал Тұрмыс. Жеңімпазға «Chevrolet Cobalt» автокөлігінің кілтін Көпесовтар әулеті атынан Аман Қайратұлы арнайы табыстады. Бұл бәйгеде де бес орынға дейін жүлде берілгенін айта кету керек.
Жанкүйер жұрттың делебесін қоздырған тағы бір бәйге – 30 шақырымдық аламан. «Көкпекті» ауыл шаруашылығы қоры аламанның бас бәйгесіне «Chevrolet Monza» автокөлігін тікті және бес орынға дейін жүлде тағайындады. 30 шақырымдық ат жарысында қалың топтан суырылып шығып, қарағандылық Бақторы атты қылқұйрық келді. Иесі – Жандос Мақсатұлы, бапкері – Ерболат, шабондоз – Бағжан.
Иә, Көкпектідегі аламанды көрген жұрт көпке дейін айтып жүрері сөзсіз. Жылқы көрсе қаны қызып, арқасы қозбайтын қазақ кем. Тұлпардың дүбірін естісе елеңдеп, еліріп кететін де осы қазақ. Ендеше бұл жолғы бәйге де рухымызды көтеріп, ұлттық мұрамызды ұлықтай алды.
