Көкпекті ауданында әлеуметтік сала қарқынды даму үстінде. Аудан әкімдігі адам капиталын дамытуға ерекше ден қойып, инфрақұрылым мен әлеуметтік жобаларға жүйелі түрде инвестиция салып жатыр. Бұл бағытта айтарлықтай оң нәтижелер бар, деп хабарлайды Tura18.kz.
Халық саны азайғанымен, даму бар
Өткен ғасырдың 90-жылдары халқының саны 30 мыңнан асқан Көкпекті ауданында қазір 13 мыңның үстінде ғана адам тұрады. Соған қарамастан кейінгі жылдары аудан әкімдігі әлеуметтік инфрақұрылымды қалпына келтіріп, халықтың өмір сүру сапасын арттыруға ерекше мән берді.
Аудан басшылығының негізгі ұстанымдарының бірі — отбасымен уақыт өткізуге мүмкіндік беретін қоғамдық кеңістіктер мен балалардың жан-жақты дамуына жағдай жасау. Бұл бағытта көптеген нақты іс атқарылды. Атап айтсақ:
Оқушылар шығармашылық сарайы жаңартылып, үйірмелер саны артты;
Жаңа үлгідегі кітапхана ашылды;
Балаларға арналған жүзу бассейні қолданысқа берілді;
Балалар ойын алаңдары, воркаут және шағын футбол алаңдары әр елді мекенде бой көтерді.
Бюджет өсіп, жолдар жөнделді
2024 жылы ауданның меншікті кірісі — 1 376 200 000 теңге болса, 2025 жылға болжамды кіріс 1 737 700 000 теңге көлемінде межеленіп отыр. Аудан әкімі бұл көрсеткішті келер жылы 2,5 миллиард теңгеден асыруды мақсат етеді.
Жол жөндеу жұмысары да қарқынды жүргізіліп жатыр. Былтыр жол жөндеуге 706,3 млн теңге бөлініп, оның 411,7 млн теңгесі игерілген. Бұл жұмыс биыл да жалғасады. Атап айтсақ:
Үлкенбөкен – Көкжайық – Үлгілімалшы бағытындағы 11 шақырым жолды орташа жөндеуге – 753 млн теңге;
Көкпекті ауылының ішкі жолдарының 5 шақырымына (Тәуелсіздік, Ы.Алтынсарин, Ш.Уәлиханов, Авдеев, Телевышка көшелері) – 274 млн теңге;
Жалпы жол жөндеу жұмыстарына 1 млрд 27 млн теңге қарастырылған.
Биыл көктемде аудан әкімі Қалбатау–Көкпекті бағытындағы республикалық автожол құрылысын жүргізіп жатқан «Синь-Син» компаниясы өкілдерімен кездесіп, нәтижесінде Саяхимов көшесі асфальтталып, қайта жаңартылды.
Ауылдар самаладай жарқырайды
2025 жылы жарықтандыру жобаларына 57,4 млн теңге бөлінді. Бұл қаржыға Үлкенбөкен, Преображенка, Үлгілімалшы, Тассай, Үшкөмей, Ақсу және Шұғылбай ауылдары жарықпен қамтамасыз етіледі.
Балалар мен жастарға арналған нысандар құрылысына келсек, 2023 жылы ойын алаңдары мен воркауттарға 20,9 млн теңге бөлінсе, 2024 жылы — 300,5 млн теңге бөлінген.
Осы қаржыға салынған нысандар:
Үлкенбөкен, Жансары – ойын алаңы (23,2 млн тг);
Үлкенбөкен – футбол алаңы (14 млн тг);
Преображенка, Үкіліқыз, Черноярка – ойын алаңы (34,8 млн тг);
Биғаш – воркаут, ойын және футбол алаңы (35,2 млн тг);
Теректі – ойын алаңы (11,6 млн тг);
Үлгілімалшы – футбол алаңы (14 млн тг), ойын алаңы (8,4 млн тг);
Үшкөмей – ойын алаңы (8,4 млн тг);
Шәріптоғай – ойын алаңы (10,3 млн тг), воркаут (6,7 млн тг);
Көкпекті ауылы – көпбалалы отбасылар тұратын үйлер жанында воркаут (6,7 млн тг) және ойын алаңы (10,3 млн тг);
Заречное – спорттық алаң (28 млн тг);
Көкпектінің орталық алаңы – әмбебап балалар алаңы (45 млн тг);
Толағай – ойын алаңы (10,3 млн тг);
Ақой және Қарамойыл – ойын алаңы (20,6 млн тг);
Шұғылбай – Жеңіс саябағы (13 млн тг).
Барлық нысандар заманауи талаптарға сай салынуда және халық игілігіне беріледі.
Медицина саласы жаңғыртылды
Аудандық ауруханада екі жоба жүзеге асырылып жатыр. Атап айтсақ:
Ғимарат қасбетін жөндеу;
Кіреберіс тобы мен шатырды жаңарту.
2010 жылы салынған нысан 2024 жылы күрделі жөндеуден өтіп, жылу жүйесі жаңартылып, қажетті медициналық жабдықтармен қамтамасыз етілді.
