Абай Құнанбайұлының 180 жылдық мерейтойы қарсаңында Абай облысында ұлттық рухты дәріптеп, салауатты өмір салтын насихаттауға бағытталған спорттық шаралар жоспарланған. Бұл туралы Олимпиадалық спорт түрлері бойынша жоғары спорт шеберлігі мектебінің директоры Мұхит Тұрсынов өңірлік коммуникациялар қызметінде өткен баспасөз жиынында мәлім етті, деп хабарлайды Tura18.kz.
Оның айтуынша, 4 тамызда Семейде күштік экстрим бойынша «Семей батыры» атты ашық турнир өтеді. Ал 3–6 тамыз аралығында қазақ күресінен ҚР Кубогының жеңімпаздары анықталады. 7 тамызда Абай жолына тағзым ретінде Семейден Қарауылға дейінгі 180 шақырымдық ультрамарафон ұйымдастырылады. Бұл шара ұлттық мұра мен тарихи жадыға құрмет ретінде өткізіледі.
Мерейтой аясындағы ірі шаралардың бірі – 7–10 тамыз күндері Қарауыл ауылында өтетін «Жеті қазына» жобасы. Бұған дейін Абай ауданының әкімі Мейіржан Смағұлов бұл жобаның аясында ұлттық спорт түрлерінің өтетінін мәлімдеген болатын.
Бағдарламада дәстүрлі садақ ату, құсбегілік, тазы жарысы, тоғызқұмалақ, қазақ күресі мен түрлі ат спорты түрлері қамтылады. Жарыстар қатарында жорға жарысы, топ бәйге, аламан бәйге бар. Қазақ күресінде «Өгіз палуан» (74 кг дейін) және «Түйе палуан» (90 кг-нан жоғары) салмақ дәрежелері бойынша сайыстар өтеді.
Жеңімпаздарға бағалы сыйлықтар қарастырылған. Аламан бәйге жеңімпазына нарықтық құны 22 миллион теңгеге дейінгі автокөлік, тоғызқұмалақ үздігіне отандық Lada Granta, ал «Түйе палуан» атанған балуанға Chevrolet Monza автокөлігі табысталады. Дәстүрлі садақ пен құсбегілікте жеңгендерге үш бас жылқыға дейін, жекелеген сайыстарда 2 миллион теңгеге дейінгі ақшалай жүлде және 1–5 бас асыл тұқымды жылқы беріледі.
Мұхит Тұрсыновтың айтуынша, бұл жарыстарға Абай облысының атынан еліміз бен шетелде жүлде алып жүрген спортшылар қатысады. Атап айтқанда, тоғызқұмалақтан әлем және Азия чемпионаттарының жүлдегері Исахан Аяна, құсбегіліктен дүниежүзілік көшпенділер ойындарының күміс иегері Ерзат Байқадамов, садақ атудан халықаралық жарыстардың жеңімпаздары Асқарбек Усабаев, Темірлан Түсіпханов, Елзат Маусымбек, сондай-ақ қазақ күресінен Қазақстан және Азия чемпиондарының жүлдегерлері – Дидар Тұқышев, Есхат Тұрсынбек және Дәурен Нуралинов бозкілемде сынға түседі.
