Абай облысының бас шаһарында күш экстримі спортынан «Семей батыры» ашық турнир өтті, деп хабарлайды Tura18.kz.
Ертіс жағалауындағы ашық аспан астында ұйымдастырылған биылғы доданың басты ерекшелігі — еліміздің түкпір-түкпірінен спортшылардың қатысуы болды. Барлық облыстан келген мықтылар өз шеберліктерін көрсетіп, күш пен төзімділіктерін сынады.
Семей қаласы денешынықтыру және спорт бөлімі басшысының уақытша міндетін атқарушы Қуат Исаждың айтуынша, жарыс бірнеше кезеңнен тұрды. Қатысушылар 70 келі тартатын ауыр қапты көтеріп жүру, «зерхер» деп аталатын ауыр затты ұзақ ұстау, 32 келілік гір тасын жұлқа көтеру, 50 келі болатын бөренені мойынға қойып отырып-тұру сынды түрлі сынақтардан өтті.
Сонымен қатар спортшылар үлкен дөңгелекті аударып, екі қолмен 70 келі тартатын гантельдерді көтеріп «фермерлік жүрістен» бақ сынады. Ал соңғы кезеңде автобус сүйреу сияқты ерекше тапсырманы орындады. Бұл жарыс нағыз батырлықты, төзімділік пен бұлшықет күшін қажет ететін дода болды.
Жарыс қорытындысы бойынша үздік нәтиже көрсеткен спортшылар бағалы жүлделер мен қаржылай сыйлықтарға ие болды.
