Семейде жалпы орта білім беретін ұйымдар арасында өткізілген «Үздік ұйым — 2025» облыстық байқауының жеңімпаздары белгілі болды,деп хабарлайды Tura18.kz.
Аталған байқау білім беру мекемелерінің оқу-тәрбие процесіндегі жетістіктерін бағалап, үздік тәжірибелерді насихаттауға бағытталған.
Биылғы байқаудың қорытындысы бойынша үш білім беру мекемесі үздік деп танылып, қомақты қаржылай сыйақыға ие болды:
- Семей қаласындағы «Білім-инновация» лицейі – 30 миллион теңге;
- Ақсуат ауданы, Би Боранбай атындағы мектеп – 20 миллион теңге;
- Аягөз қаласындағы №1 жалпы орта білім беретін мектеп – 18 миллион теңге.
Бұл марапаттар – білім беру сапасын арттырудағы қажырлы еңбек пен жаңашыл тәсілдердің жемісі. Жеңімпаздар қатарындағы білім ордалары оқу бағдарламаларын тиімді ұйымдастырып, оқушылардың шығармашылық және ғылыми әлеуетін дамытуда жоғары нәтиже көрсеткен.
Байқау білім беру сапасын көтеруді көздей отырып, облыс мектептерін кәсіби бәсекеге қабілеттілікке ынталандырады. Сонымен қатар жеңіп алынған қаражат білім ордаларының материалдық-техникалық базасын нығайтуға және оқу үдерісін заманауи талаптарға сай жетілдіруге бағытталмақ.
Облыстық білім басқармасының мәліметінше, мұндай байқаулар алдағы уақытта да дәстүрлі түрде жалғасатын болады. Бұл – білім беру саласындағы сапаны арттырып қана қоймай, ұстаздар мен оқушылардың ынтасын арттыратын маңызды бастама.
Қайрат Қасымбек
