Семей қалалық мәслихатының кезекті сессиясында шаһардың әлеуметтік-экономикалық дамуы мен алдағы жоспарлар кеңінен талқыланды. Жиынға қала әкімі Әділет Нұрсағатұлы қатысты, деп хабарлайды Tura18.kz.
Сессияның күн тәртібінде қала әкімінің атқарған жұмысы туралы есебі, 2025 жылғы қалалық бюджеттің орындалуы, мәслихат пен оның тұрақты комиссияларының қызмет қорытындылары сияқты маңызды мәселелер қаралды. Сонымен қатар өрт қауіпсіздігін қамтамасыз ету және биылға арналған туристік жарна мөлшерлемесін белгілеу жайы талқыланды.
Қала әкімі былтырғы негізгі нәтижелерге тоқталды. Оның айтуынша, 2025 жылы жоспарланған басты әлеуметтік-экономикалық көрсеткіштер толық орындалған. Өнеркәсіп өндірісінің көлемі 380,4 млрд теңгеге жетіп, өсім қарқыны 116,5 пайыз болды. Ал нақты көлем индексі 100,2 пайыз деңгейінде қалыптасқан.
Инвестиция тарту көрсеткіштері де оң динамика көрсеткен. Негізгі капиталға салынған инвестиция көлемі 194,7 млрд теңгеге жетіп, алдыңғы жылмен салыстырғанда 17,7 пайызға артқан. Бұл ретте нақты көлем индексі 114,4 пайыз болды..
Инфрақұрылымды дамыту бағытында да жүйелі жұмыс жүргізіліп келеді. Былтыр қаладағы 52 көшеге орташа жөндеу жүргізілсе, биыл оны 100 көшеге жеткізу жоспарланып отыр. Бұдан бөлек 100 аулаға асфальт төсеу көзделген.
Абаттандыру жұмысы да кезең-кезеңімен жүзеге асырылып жатыр. 2025 жылы 35 аула жаңартылса, алдағы уақытта 100 аула аумағын абаттандыру жоспарланған.
Қала көшелерін жарықтандыру мәселесі де назардан тыс қалған жоқ. Былтыр 15 көше жарықтандырылса, биыл бұл бағыттағы жұмыс көлемі айтарлықтай ұлғайып, 100 көшені қамту жоспарланып отыр.
Сессия қорытындысында күн тәртібіндегі барлық мәселелер қаралып, тиісті шешімдер қабылданды.
