Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» экологиялық бағдарламасы аясындағы жалпыұлттық акцияға Абай облысының тұрғындары да белсенді қатысты. Өңірдің 10 ауданы мен екі қаласында 15 мыңға жуық адам 300 гектар аумақтан 1 мың тонна қоқыс жинап, 5 мың түп көшек екті, деп хабарлайды Tura18.kz.
Абай облысы әкімі баспасөз қызметінің хабарлауынша, Семейде өткен жалпықалалық ауқымды сенбілік барысында қала аумағында 1 мың түп ағаш отырғызылды. Әуелі Қарағайлы ықшам ауданында салынып жатқан жаңа саябақта қарағай көшеттері егілді. Бұл іс-шараға облыс әкімі Берік Уәли қатысты.
Сондай-ақ әуежайға баратын жол бойында да көгалдандыру жұмысы жүргізілді. Мұнда 300 түп жасыл желек егілді. Ағаш отырғызу шарасына Семей қаласы әкімдігі мен мемлекеттік мекемелердің жүзге жуық қызметкері атсалысты.
«Таза Қазақстан» экологиялық бағдарламасы аясында өңірде жүйелі жұмыстар атқарылып келеді. Абай облысында 44 іс-шарадан тұратын өңірлік жоспар бекітілген.
Биылғы санитарлық-экологиялық екі айлыққа 227 мыңнан астам тұрғын, 10 275 ұйым және 4114 техника тартылды. Нәтижесінде 39,3 мың тонна тұрмыстық қалдық шығарылды.
Биылғы 27 қыркүйекте облыстың барлық елді мекендерінде экологиялық сенбілік ұйымдастырлды. Оған барлығы 10 мың адам, 500-ге жуық ұйым қатысты. Нәтижесінде 1050 тонна қоқыс жиналды.
Абай облысында 2022-2024 жылдары 213 мыңнан астам көшет егілсе, осы жылдың басынан бері ғана 57 мыңнан астам түп жасыл желек отырғызылды. Бағдарлама шеңберінде экологиялық мәдениетті қалыптастыру мен табиғатты қорғау бағытындағы жұмыстар тұрақты түрде жалғаса береді.
