Абай облысында өңірді жылу және электр қуатымен тұрақты қамтамасыз ету үшін бірқатар ауқымды инфрақұрылымдық жобалар жүзеге асырылмақ. Бұл туралы облыс әкімі Берік Уәли Үкімет отырысында мәлімдеді, деп хабарлайды Tura18.kz.
Өңірдің көмірге жылдық қажеттілігі 1,247 млн тоннаны құрайды. Негізгі жеткізуші – Қаражыра кен орнын игеріп отырған «Қаражыра» АҚ. Кәсіпорынның өндірістік қоры 780 млн тоннаға жетеді және республикадағы көмір өндірісінің шамамен 8 пайызын қамтамасыз етеді. Былтыр мұнда 6,9 млн тонна көмір өндірілсе, биыл бұл көрсеткішті 8,2 млн тоннаға дейін арттыру жоспарланған. Ал 2029 жылдан бастап өндіріс көлемін жылына 14,2 млн тоннаға жеткізу көзделіп отыр.
Энергетикалық инфрақұрылымды күшейту мақсатында Семей қаласында қуаттылығы 1000 гигакалория және 360 мегаватт болатын үшінші жылу электр орталығын салу жоспарланған. Құрылыс биыл басталып, 2029 жылы аяқталмақ.
Сонымен қатар Курчатов қаласында жалпы қуаты 700 мегаватт болатын конденсациялық электр станциясы кезең-кезеңімен іске қосылады: алғашқы 350 мегаватт 2026–2029 жылдары, қалған бөлігі 2029–2030 жылдары пайдалануға берілмек.
Өңірде көмір-химия саласы да дамытылады. Курчатовта жылына 300 мың тонна аммиак пен 520 мың тонна карбамид өндіретін кешен салу жоспарланып отыр.
Облыс басшылығының мәліметінше, бұл жобалар энергия тапшылығын азайтып, өңірдің экономикалық тұрақтылығы мен дамуына серпін береді.
