Абай облысында ірі өндірістік жоба қолға алынып, өңірдің өнеркәсіптік әлеуетін арттыруға бағытталған жаңа кен орны іске қосылмақ. Бұл туралы облыс әкімінің «Aidarly Mining» ЖШС өкілдерімен кездесуі барысында мәлім болды, деп хабарлайды Tura18.kz.
Кездесуде Аягөз ауданында орналасқан «Айдарлы» кен орнын игеру жобасы жан-жақты талқыланды. Жоба аясында тау-кен байыту комбинатын салу жоспарланған. Кәсіпорын ашық әдіспен жұмыс істеп, жылына 75 миллион тонна кен өндірмек. Өндіріс нәтижесінде құрамында 23 пайыз мыс бар 1,1 миллион тонна мыс концентраты және 7,5 мың тонна молибден концентраты алынбақ.
Компания өкілдерінің айтуынша, қазір жобалау жұмысы жүргізіліп жатыр. Құрылыс-монтаж кезеңін биыл бастау жоспарланса, кәсіпорынды толық іске қосу 2029 жылға межеленген. Жалпы жоба 2030 жылға дейін кезең-кезеңімен жүзеге асырылады.
Қазір жобалау жұмыстарын жүргізіп жатырмыз. Осы жылы құрылыс-монтаж жұмысын бастаймыз. Кәсіпорынды 2029 жылы іске қосуды жоспарлап отырмыз, – деді «Aidarly Mining» ЖШС бас директоры Ерғали Батталов.
Аймақ басшысы бұл бастаманың өңір экономикасы үшін стратегиялық маңызға ие екенін атап өтті. Оның айтуынша, мұндай ірі инвестициялық жобалар жаңа жұмыс орындарын ашып қана қоймай, облыстың өндірістік әлеуетін күшейтеді.
Мемлекет басшысы Қасым-Жомарт Тоқаев инвестиция тартуды экономиканың басты басымдықтарының бірі ретінде атап өтті. Өңіріміз үшін жаңа өндіріс орындары аса қажет. Әкімдік тарапынан заң аясында қажетті қолдау көрсетіледі, – деді Берік Уәли.
Жоба толық іске асқан жағдайда 1800-ден астам жаңа жұмыс орны ашылады деп күтілуде. Бұл өз кезегінде Аягөз ауданының әлеуметтік-экономикалық дамуына серпін бермек.
Айта кетейік, қазіргі уақытта облыста 2023–2027 жылдарға арналған геологиялық барлау жоспары аясында кешенді жұмыстар жүргізілуде. Соның нәтижесінде алтын, уран және өзге де пайдалы қазбалар бойынша 64 резервтік кен орны анықталған. Мамандардың пікірінше, бұл өңірдің минералдық-шикізат базасының әлеуеті жоғары екенін көрсетеді.
