Аймвақ басшысы Берік Уәлидің төрағалығымен өткен кеңейтілген аппараттық кеңесте көктемгі су тасқынына дайындық мәселесі қаралды. Кеңеске облыстық басқармалар мен департамент басшылары қатысып, аудан және қала әкімдері бейнережимде қосылды. Бұл туралы Абай облысы әкімінің баспасөз қызметі мәлім етті, деп хабарлайды Tura18.kz.
Төтенше жағдайлар департаментінің мәліметінше, өңірде су басу қаупі бар 64 елді мекен бар, онда 42 мыңнан астам адам тұрады. Қазіргі уақытта 22 елді мекенде қауіп деңгейі төмендетілген. «Қазгидромет» болжамына сәйкес, Ақсуат, Аягөз, Бесқарағай, Бородулиха, Жарма және Көкпекті аудандары жоғары тәуекел аймағында қалып отыр.
Мұз кептелістерінің алдын алу үшін Ертіс пен Үбі өзендерінің жекелеген учаскелерінде жарылыс жұмыстарын жүргізу жоспарланған. Қауіпсіздік шараларын нақтылау мақсатында арнайы комиссияның көшпелі отырыстары өткізілуде.
Су тасқыны жағдайына дайындық аясында облыс бойынша 2 285 адам, 888 техника, 33 жүзу құралы және 190 су сору қондырғысы әзірленді. Семей әуежайында Ми-8 тікұшағы кезекшілікке қойылған. Азаматтық қорғау қызметтерінің дайындығын тексеру үшін 27–28 ақпанда «Көктем-2026» республикалық оқу-жаттығуы өтеді.
Аймақ басшысы аудан және қала әкімдеріне күштер мен құралдардың толық дайындығын қамтамасыз етуді, эвакуациялық пункттерді әзірлеуді, қар шығару жұмыстарын күшейтуді және қажетті қорларды жинақтауды тапсырды.
