Абай облысында жылыжай шаруашылығын дамыту қарқын алып келеді. Соның айқын дәлелі – Семей қаласында салынып жатқан заманауи жылыжай кешені. Жалпы аумағы 1 гектар болатын кешен суық климатқа бейімделген америкалық технологиялармен жабдықталады. Жобаға салынған инвестиция көлемі — 3 млрд теңге, деп хабарлайды Tura18.kz.
Қазір жобаның алғашқы кезеңі аяқталуға жақын. Бұл кезеңде жалпы аумағы 1300 шаршы метр болатын екі жылыжай салынады. Оған 400 млн теңге бағытталған.
Биыл сәуірде жылыжайларға қияр мен қызанақ көшеттері егілді. Заманауи жылыту жүйесінің арқасында кешенде жыл бойы көкөніс өсіруге мүмкіндік туып отыр.
Абай облыстық ауыл шаруашылығы басқармасының басшысы Ертай Қуанбаевтың айтуынша, жобаның екінші кезеңінде тағы сегіз жылыжай салу жоспарланып отыр. Жоба толық іске қосылғаннан кейін өңірде көкөніс пен жеміс-жидекті жыл бойы өндіру мүмкіндігі артады. Бұл өз кезегінде ішкі нарықты сапалы әрі жергілікті өніммен қамтып, облыстың азық-түлік қауіпсіздігін нығайтуға ықпал етпек.
Сарапшылардың пікірінше, мұндай ірі инвестициялық бастамалар агроөнеркәсіп кешенінің әлеуетін арттырып, тұрғындарды қолжетімді әрі сапалы өніммен қамтамасыз етуге жол ашады.
