Абай облысысының әкімі Берік Уәли Семейдің сол жағалауында орналасқан «ЖЭО-1» қазандығында жүргізілген жөндеу жұмыстарымен танысты, деп хабарлайды Tura18.kz.
Облыс әкімі баспасөз қызметінің мәліметінше, жылу орталығы қаладағы 389 көп қабатты тұрғын үйді, 51 әлеуметтік нысанды, 60 бюджеттік ұйым мен 632 коммерциялық кәсіпорынды жылумен қамтамасыз етеді. Жалпы абоненттер саны – 24 463.
СУ ЖҮЙЕСІ ЖАҢАРТЫЛДЫ
Жылу орталығында бес ірі қазандық жұмыс істейді. Оның төртеуі негізгі, біреуі қосымша қазандық ретінде пайдаланылады. Биыл мұндағы бірнеше қазандықта ауа қыздырғыштар, көмір жүретін лента толық ауыстырылып, экранды құбырлар жаңартылды.
Жылу орталығының басшысы Алмас Күзкеновтің айтуынша, су жүйесінде де ауқымды жұмыстар атқарылды. Бұған дейін Ертістен алынған су алдымен химиялық тазартудан өткізіліп, содан кейін күшейту үшін сорғылар арқылы жіберілетін. 1960 жылдардан бері жұмыс істеп тұрған сорғы қондырғылары биыл толық ауыстырылды. Көмір қоры да жеткілікті, қазіргі уақытта қоймада 74 мың тонна тұр.
5 ҚАЗАНҒА ДЕЙІН АЯҚТАЛАДЫ
Қазіргі таңда облыстың барлық қала және аудандарында жылу көздері іске қосылып, абоненттерді жылумен жабдықтауға кезең-кезеңімен қосу басталды. Әлеуметтік нысандарға бірінші кезекте жылу беріліп, барлық нысандарды толық қосу 5 қазанға дейін аяқталады.
Аймақ басшысы жылу орталығын аралап, көмір қоймасын көрді.
Өңірде 29 қыркүйектен жылу беруді бастадық. Әлеуметтік нысандарға жылу берілді. Тұрғын үйлер өздері қажетіне қарай қосып жатыр. Биыл Үкіметтің қолдауымен облыстағы тозығы жеткен бірқатар жылу желілері қалпына келтіріліп, ауыстырылды. Бұл бағыттағы жұмыстар жүйелі түрде, кезең-кезеңімен жалғасады, – деді облыс әкімі.
ҚАЙ АУДАННЫҢ ҚАЗАНДЫҚТАРЫ ЖӨНДЕЛДІ?
Биыл Үкімет резерві мен облыстық бюджет есебінен Семейдің жылу электр орталығы мен Аягөздегі «Орталық» қазандығында, жылу желілерінде жаңғырту жұмыстары жүргізілді. Жарма ауданы Шуақ ауылындағы қазандыққа жөндеу жүргізілді.
Әмір Бек
