Елордада 15–17 жас аралығындағы еліміздің әр аймағынан келген талантты жасөспірімдер қатысқан ең беделді жобалардың бірі — «El Umiti» премиясының финалдық кезеңі өтті. Биыл байқауға 500-ге жуық өтінім келіп түскен. Қатаң іріктеуден өткен 21 жас дарын шешуші кезеңде бақ сынады, деп хабарлайды Tura18.kz.
Қатысушыларға берілген негізгі тапсырма — қоғамда жиі кездесетін әлеуметтік мәселелерді қысқаметражды фильм арқылы сипаттап, оны шешудің жаңа әрі тиімді жолдарын ұсыну болды. Осы кезеңде Абай облысындағы «БІЛІМ-ИННОВАЦИЯ» лицейінің 11-сынып оқушысы Алишер Әділхан «Гаджетке тәуелділік» тақырыбында 5 минуттан асатын туындысын ұсынып, байқаудың І орнын жеңіп алды.
Фильм небәрі бір апта ішінде түсірілген. Қазақ тілінде дайындалған жобаға ағылшын тіліндегі субтитрлер де қосылған. Автордың айтуынша, әлеуметтік желілерде ұзақ уақыт өткізу адамның зейінін төмендетіп, шынайы өмірмен байланысын әлсіретеді. Осы ойды нақты әрі әсерлі жеткізгені үшін Алишердің жұмысы қазылар алқасының жоғары бағасына ие болып, 2 миллион теңге көлеміндегі бас жүлдемен марапатталды.
Алишер алдағы уақытта жобасын кеңейтіп, ата-аналардың да гаджетке тәуелділігін көрсете отырып, олардың бұл әдеті балалардың мінез-құлқына қалай ықпал ететінін ашып көрсетуді жоспарлап отыр. «Ұяда не көрсең, ұшқанда соны ілесің» дегенді басшылыққа ала отырып, отбасындағы тәрбие мен үлгінің маңызын фильмде бейнелеуді көздейді.
Бұл жеңіс – Абай өңірі жастарының білім мен шығармашылықтағы әлеуетінің айқын көрінісі. Айта кетерлігі, дәл осы байқауда былтыр да аталмыш лицейдің оқушылары топ жарып, бас жүлдені иеленген болатын. Сәйкесінше, өңір жастары қатарынан екінші жыл үздіктер қатарында аталып отыр.
«El Umiti» Премиясы – жасөспірімдердің әлеуетін арттыруға бағытталған «El Umiti» Корпоративтік қорының бастамасымен жүзеге асатын ерекше жоба. Бұл платформа жастарға білім, спорт, еріктілік, қоршаған ортаны қорғау мен ұлттық құндылықтарды дәріптеу бағытында өзін-өзі дамытуға жол ашады.
