Абай облысының әкімі Берік Уәли Жаңасемей ауданының Қайнар ауылында жергілікті тұрғындармен кездесті. Жиында аудан әкімі 2024–2025 жылдардағы негізгі көрсеткіштерді баяндап, атқарылған жұмыстар туралы айтты. Аймақ басшысы өңірдің әлеуметтік-экономикалық дамуы, өзекті мәселелер және алдағы жоспарлар жөнінде ақпарат берді, деп хабарлайды Tura18.kz.
Жаңасемей ауданы мал және егін шаруашылығына бағытталған. Биыл шаруалар 14,9 мың гектар егін жинады, әсіресе картоп пен көкөніске сұраныс жоғары. Облыс бойынша 451 ауыл шаруашылығы техникасы жаңартылып, «Кең дала – 2» бағдарламасы аясында жеңілдетілген несие берілді, оның бір бөлігі жергілікті диқандарға тиесілі.
Ауданда құны 46,7 млрд теңге болатын алты инвестициялық жоба жүзеге асуда. Бұл ауыл шаруашылығы өнімдерін ұлғайтуға және жаңа жұмыс орындарын ашуға мүмкіндік береді. Сондай-ақ 6,8 мың гектар алқапқа су үнемдеу технологиясы енгізілген, 11,4 мың тонна ет өндіретін ет комбинаты салынып жатыр.
Облыс көлемінде инвестициялық жобалар саны мен көлемі артқан. Жаңасемей ауданында да 110,7 млрд теңгелік тоғыз жоба іске асуы жоспарланған. Инженерлік инфрақұрылым да жаңартылуда: жылу көздері мен құбырлар жөнделді, бірқатар ауылдарда су жүйелері жаңартылып, қазандықтар ауыстырылды.
Білім беру және денсаулық сақтау нысандары да жаңғыртылып келеді: бірнеше мектеп жөндеуден өтті, қажетті жабдықтар сатып алынды, медициналық пункттер салуға құжаттама әзірленуде.
Кездесу қорытындысында тұрғындардың ұсыныстары тыңдалды. Облыс әкімі Қайнар ауылындағы Мәдениет үйіне жақында музыкалық аппарат пен LED-экран берілетінін айтты. Тұрғындар аймақ басшысына қолдауы үшін алғыс білдірді.
